Пасол Расіі Бабіч: Паміж мяккай беларусізацыяй і дэрусіфікацыяй вельмі тонкая мяжа
Карэспандэнт RT пацікавіўся ў дыпламата, што азначае палітыка мяккай беларусізацыі, якая праводзіцца ў краіне «з ведама ўладаў», і ці можа гэта пагражаць рускамоўнаму насельніцтву Беларусі.
Міхаіл Бабіч. Фота Wikimedia Commons.
— Вельмі тонкая мяжа паміж мяккай беларусізацыяй і дэрусіфікацыяй. Патлумачу, у чым гэтая тонкасць заключаецца. Насамрэч вывучэнне роднай мовы, роднай гісторыі, роднай культуры, традыцый свайго народа — гэта нават не права, гэта абавязак любога народа, які не хоча страціць самаідэнтычнасць. І было б дзіўна якім-небудзь чынам абмяжоўваць у незалежнай і суверэннай дзяржаве гэтыя магчымасці.
Пасол таксама прывёў у прыклад савецкі перыяд — на яго думку, менавіта тады актыўна развівалася беларуская мова, нацыянальная культура, нацыянальная адукацыя. Ён лічыць, што калі Беларусь і сёння ідзе ў гэтым кірунку, то ў гэтым няма нічога дрэннага. Пры гэтым Міхаіл Бабіч адзначыў, што гэта не павінна адбывацца за кошт ушчамлення рускай мовы, сумеснай культуры ці гісторыі.
— Знайсці гэты баланс сёння вельмі важна, каб не скаціцца ў гэтую негатыўную рыторыку, пад якой часцяком нічога няма. Я ўжо шмат разоў казаў, наколькі беражлівыя адносіны ў Беларусі да рускай мовы. На яе ніхто не замахваецца, наадварот ствараюцца ўмовы для развіцця. Таму тут трэба ўважліва глядзець, што насамрэч адбываецца, а што нам спрабуюць навязаць як нейкія працэсы, якія нібыта адбываюцца. Але гэты баланс трэба ўлічваць, і ні ў якім разе не замахвацца на аспект нацыянальнай культуры, развіцця мовы і іншых элементаў самаідэнтычнасці народа.
