«Марак з ЗША» выманіў у даверлівай жыхаркі Барысава 41 тысячу даляраў
Усё пачалося яшчэ ў красавіку 2018 года. Жанчына ў сацсетцы пазнаёмілася з мужчынам, які назваўся разведзеным 52-гадовым мараком з ЗША, піша СК.
Праз некалькі месяцаў мужчына сказаў, што ў яго заканчваецца кантракт у Тайландзе і каб адтуль з'ехаць, яму патрэбныя неабходныя дакументы. Ён прасіў аказаць дапамогу пры дастаўцы яму гэтых дакументаў. Жанчына павінна была атрымаць пасылку і адправіць яму ў Тайланд. У наступных лістах гаварылася пра тое, што пасылка ўжо ў Беларусі, аднак для яе атрымання неабходна аплаціць мытны збор.
Усяго даверлівая жанчына ў некалькі этапаў пералічыла на прадастаўленыя ёй рэквізіты больш за 41 тысячу даляраў ЗША, узяўшы пазыку ў знаёмых і аформіўшы крэдыты.
У ходзе расследавання ўстаноўлена, што пацярпелая пералічвала грошы на рахунак у Гану. Следчым накіраваны міжнародныя запыты аб аказанні прававой дапамогі.
