Пляменнік прапагандыста Кісялёва сядзіць у нямецкай турме за тое, што ваяваў за «ДНР»
Пляменнік расійскага прапагандыста Дзмітрыя Кісялёва асуджаны ў Германіі за ўдзел у баях на Данбасе на баку «ДНР». Пра гэта тэлевядучы паведаміў у інтэрв'ю Юрыю Дудзю.
Па словах Кісялёва, яго пляменнік Сяргей ваяваў у шэрагах баевікоў «ДНР» і быў узнагароджаны медалём.
«Ён сказаў, што «я рускі» і паехаў ваяваць. У яго загінуў камандзір узвода, ён узяў, так бы мовіць, на сябе камандаванне і ўзнагароджаны нават нейкім медалём данецкім», — заявіў Кісялёў.
Паводле яго слоў, пляменнік мае грамадзянства Германіі і быў арыштаваны пасля таго, як пакінуў Украіну. «Ён пасля гэтага пайшоў у манастыр, пастрыгся ў манахі на Афоне, паехаў кудысьці ў Балгарыю. Яго арыштавалі і адправілі ў Германію. Цяпер ён сядзіць у турме па дрэнным артыкуле — тэрарызм, зброя — за тое, што ваяваў», — расказаў Кісялёў.
