Ігар Марзалюк: Палессе — прарадзіма ўсіх славян, а пінскаму музею трэба вярнуць статус рэспубліканскага
На ўрачыстай цырымоніі ў гонар надання Пінску звання «Культурная сталіца — 2019» ў пінскім палацы культуры доктар гістарычных навук і палітык Ігар Марзалюк сказаў:
— Мы зараз знаходзімся ў сэрцы славяншчыны. Таму што менавіта тут пачалося тое, што мы называем славянскімі мовамі, — гэта заходне-палескія дыялекты і заходне-палеская культура. Гэта маткавая славянская культура, гэта даказана лінгвістамі, археолагамі і антраполагамі.
Не Вісла і Одэр, а Прыпяць і Піна з'яўляюцца першымі рэкамі славянскай прарадзімы. І менавіта адсюль з беларускага Палесся ў VI стагоддзі пачаўся націск славян і на Усход, Захад і ў Цэнтр Еўропы.
Таму ўсе славянскія народы: палякі, чэхі, славакі, рускія, украінцы і балгары роўна настолькі славяне, наколькі ў іх бурліць палеская кроў, колькі ў іх пінскіх, брэсцкіх, гомельскіх продкаў. Гэта даказаны факт.
Акрамя таго, Марзалюк заклікаў вярнуць пінскаму музею Беларускага Палесся статус рэспубліканскага.
