У Мінску пабудуюць дзве дзіцячыя паліклінікі — у Сухараве і на Трактарным заводзе
Сёлета ў Партызанскім і Фрунзенскім раёнах плануюць пачаць узвядзенне дзіцячых паліклінік, паведаміў карэспандэнту агенцтва «Мінск-Навіны» старшыня камітэта па ахове здароўя Мінгарвыканкама Сяргей Малышка.
— Праектна-каштарысная дакументацыя па будаўніцтве дзіцячай паліклінікі ў Сухараве на 480 наведванняў у змену ўжо распрацаваная. Дакумент яшчэ павінен прайсці экспертызу, пасля чаго пачнём да ўзвядзення гэтага аб'екта, — адзначыў С. Малышка. — Будаўніцтва паліклінікі павінна пачацца ў 2019 годзе.
Мяркуецца, што ў новую ўстанову аховы здароўя пяройдуць больш за 18 тысяч дзяцей і падлеткаў, якія цяпер прымацаваныя да 10-й гарадской паліклінікі.
Акрамя таго, у красавіку 2019 года павінен быць гатовы праект будаўніцтва 9-й гарадской дзіцячай паліклінікі. Яе ўзвядуць на пляцоўцы па старым адрасе: вул. Даўгабродская, 39. Нагадаем, рашэнне аб зносе 9-й дзіцячай паліклінікі было прынята гарадскімі ўладамі некалькі гадоў таму: будынак 1950-х гадоў пабудовы немэтазгодна было рамантаваць.
У цяперашні час пацыентаў 9-й дзіцячай паліклінікі (да яе прымацаваныя каля 16 тысяч чалавек) прымаюць на плошчах 14-й цэнтральнай раённай паліклінікі.
Што датычыцца будаўніцтва дзіцячай паліклінікі ў Лошыцы-9, то яно пакуль зацягваецца. Праблема ў тым, што на пляцоўцы, адведзенай пад узвядзенне гэтага аб'екта, яшчэ не знесены жылыя пабудовы. Гаворка ідзе пра прыватны сектар.
