У мінскім метро расказалі, колькі пасажыраў перавезлі за мінулы год
Амаль 283,36 мільёна пасажыраў у 2018 годзе скарысталіся паслугамі мінскага метрапалітэна, прычым самы вялікі пасажырапаток — каля 26,6 мільёна чалавек — назіраўся ў кастрычніку, паведамляе сайт метро.
Фота: мінскі метрапалітэн.
Маскоўская лінія аказалася крыху больш загружанай: яе цягнікі перавезлі каля 163,4 мільёна чалавек, Аўтазаводскай — амаль 120 мільёнаў.
Самымі загружанымі станцыямі з папярэдняга года застаюцца «Каменная Горка» і «Плошча Леніна». Станцыю «Плошча Якуба Коласа», якая займала трэці радок па колькасці пасажыраў у 2017 годзе, на гэты раз апярэдзіла станцыя «Уручча».
Традыцыйна найменш загружанымі аказаліся «Купалаўская» і «Першамайская».
Жэтоны для аплаты праезду выкарыстоўвалі каля 35% пасажыраў. Бескантактавымі банкаўскімі картамі на турнікетах скарысталіся больш за 5,7 мільёна разоў.