Тора, кабала і таемныя веды. У Віцебску адкрылі «ўніверсітэт» іўдаізму для мужчын
У Віцебску адкрыўся першы колель для дарослых іўдзеяў, дзе будуць бясплатна вучыць Тору, а таксама кабале і таемнаму сэнсу жыцця. Ініцыятарам праекта выступіла віцебская іўдзейская рэлігійная абшчына «Дом Ізраіля», якую ўзначальвае вядомы бізнэсмен і старшыня рады дырэктараў «Аптэка груп» Леанід Томчын. Раней пры яго ўдзеле была пабудавана першая за 100 гадоў сінагога ў паўночнай сталіцы Беларусі.
Колель афіцыйна не мае статусу навучальнай установы, але яго часта называюць «аспірантурай іўдаізму». У Віцебску будуць паглыблена вывучаць звод запаведзяў і канонаў у іўдаізме. Акрамя таго, слухачы змогуць зразумець і асэнсаваць іўдзейскі светапогляд і стаўленне да жыцця габрэйскага народа.
Прайсці навучанне можна будзе бясплатна. Заняткі будуць праходзіць тры разы на тыдзень па некалькі гадзінаў кожны. У віцебскі колель змогуць з'язджацца іўдзеі з усёй краіны.
Колелі пры іўдзейскіх супольнасцях з'явіліся каля паўтары стагоддзі таму. Яны мелі на мэце навучанне выключна жанатых габрэйскіх мужчын, якія такім чынам маглі сумяшчаць працу, сямейнае жыццё і духоўнае развіццё. З тых часоў колелі змяніліся нязначна. У прыватнасці ў Віцебску дазволена навучацца як жанатым, так і халастым мужчынам.
У будучыні плануецца таксама адкрыць жаночы колель.
У першую мужчынскую групу ўжо залічаны 12 студэнтаў. Сярод іх — інжынер, праграміст, лекар, медбрат, таксіст, школьны настаўнік і біёлаг. Узрост студэнтаў — ад 30 да 40 гадоў, геаграфія — Віцебск і раённыя цэнтры.
Заняткі будуць праходзіць у новай віцебскай сінагозе «Шацёр Давіда».
