«Катастрафічная параза ўрада»: брытанскі парламент адхіліў дамову аб выхадзе з ЕС
Брытанская палата абшчын у аўторак дала старт вялікім узрушэнням, пераважнай большасцю галасоў адхіліўшы ўзгоднены урадам Брытаніі і Еўрасаюзам праект дамовы аб выхадзе з ЕС. Лідар апазіцыі Джэрэмі Корбін тут жа ініцыяваў вотум недаверу ўраду, піша BBC.
Гэта можа прывесці да адстаўкі ўрада, датэрміновых выбараў, адтэрміноўкі «брэкзіту» і нават паўторнага рэферэндуму аб членстве Брытаніі ў Еўрасаюзе.
Супраць дамовы прагаласавалі 432 дэпутаты, за яе — 202 дэпутаты, і паразы ўрада з такім разрывам — 230 галасоў — не было яшчэ ніколі ў гісторыі брытанскага парламента.
«Гэта катастрафічнае паражэнне ўрада», — сказаў лідар апазіцыйнай Лейбарысцкай партыі Джэрэмі Корбін і абвясціў, што афіцыйна ўносіць прапанову аб вотуме недаверу ўраду.
Тэрэза Мэй, у сваю чаргу, абвясціла, што калі апазіцыя ініцыюе вотум недаверу ўраду, то яе кабінет гатовы арганізаваць абмеркаванне і галасаванне заўтра ж.
