«Лукашэнка грубіяніць, Масква цярпіць, а Бабіч фарміруе баявую групу». Як расійскія СМІ адрэагавалі на нараду ў Лукашэнкі?
Размовы пра аб'яднанне Беларусі з Расіяй дурныя і прыцягнутыя за вушы. Пра гэта Аляксандр Лукашэнка заявіў на нарадзе па сацыяльна-эканамічным развіцці краіны ў 2019 годзе і падыходах да далейшага развіцця інтэграцыйных напрамкаў. Таксама Лукашэнка на нарадзе прапанаваў пачаць пастаўку нафты ў Беларусь праз краіны Балтыі.
Чытайце таксама:
«Няма такой магчымасці ў Расіі, улічваючы наступствы ўсяго, на гэта пайсці»: Лукашэнка назваў прыцягнутымі за вушы размовы пра аб'яднанне з Расіяй
Лукашэнка прапануе пачаць пастаўкі нафты ў Беларусь праз краіны Балтыі
Каментар: Так нафту праз прыбалтыйскія парты не пастаўляюць
Расійскія СМІ неадкладна адрэагавалі на свежыя заявы кіраўніка Беларусі новымі публікацыямі. «Наша Ніва» прадстаўляе вашай увазе традыцыйны дайджэст публікацый расійскіх медыя на тэму беларуска-расійскіх адносін.
Коммерсант FM: Лукашэнка пераходзіць у контрнаступленне
Палітычны аглядальнік «Коммерсант FM» Дзмітрый Дрызе на падставе нарады ў Лукашэнкі робіць выснову, што кіраўнік Беларусі перайшоў у сур'ёзнае контрнаступленне.
Як вядома, перад самым Новым годам ён двойчы сустракаўся з Уладзімірам Пуціным і, мяркуючы па ўсім, абодва разы без асаблівых вынікаў. То бок, тэарэтычна Расія не супраць кампенсаваць хаўрусніку страты, аднак усё гэта трэба асэнсаваць, аформіць, абмеркаваць. Для гэтага створана спецыяльная камісія. Але колькі яна збіраецца засядаць, да якіх высноваў прыйдзе і галоўнае калі — незразумела. А грошы патрэбныя цяпер. Гэта вельмі падобна на спробу максімальна забюракратызаваць працэс, лічыць расійскі аглядальнік.
Дрызе не верыць, што Лукашэнка гатовы сапраўды адысці ад Расіі і на прыкладзе Украіны паспрабаваць сысці на Захад.
«Альбо новыя сябры навяжуць такія рэформы, што расійскі падатковы манеўр будзе здавацца нявінным свавольствам. Ды і паклаўшы руку на сэрца, наколькі Аляксандра Рыгоравіча можна лічыць хаўруснікам»,
— мяркуе аглядальнік.
ТАСС: Беларусь не зможа замяніць расійскую нафту альтэрнатыўнымі пастаўкамі
Агенцтва ТАСС нагадвае, што пагрозы адмовіцца ад расійскай нафты паступалі ад Лукашэнкі і раней. Знайсці альтэрнатыўных пастаўшчыкоў даручалася ў 2016 годзе, калі Расія на фоне газавай спрэчкі з Беларуссю скараціла пастаўкі нафты. Тады ў якасці новай крыніцы сыравіны называўся Іран. Да 2012 года Беларусь закупляла нафту ў Венесуэлы, у 2016 годзе — у Азербайджана.
«Пастаянна, як толькі ўзнікаюць складанасці ў перамовах, гучыць тэзіс пра тое, што нам не патрэбна ваша нафта — мы знойдзем гэтую нафту дзе хочаце. Калі чалавек 10 гадоў гаворыць пра пошукі іншай нафты, але не знаходзіць яе, гэтаму, мабыць, ёсць прычына і яна простая — таму што любая сыравіна будзе даражэйшая за расійскую», — сказаў ТАСС генеральны дырэктар Фонду нацыянальнай энергетычнай бяспекі Канстанцін Сіманаў.
Паводле яго слоў, праведзеныя ім разлікі паказваюць, што «ніякай эканомікі ў пастаўках з Венесуэлы і Ірана ў Беларусь няма».
Па словах прэзідэнта Інстытута энергетыкі і фінансаў Уладзіміра Фейгіна, пры імпарце нафты па рынкавых цэнах у Беларусі знікае эканамічная мэтазгоднасць перапрацоўваць яе і экспартаваць нафтапрадукты.
Эксперты нагадваюць пра тое, што ўласнай нафтай Беларусь таксама загрузіць свае заводы не можа, бо здабывае прыкладна 1,5 млн тон у год, а перапрацоўвае — больш за 18 млн тон у год.
Пагрозы адмовіцца ад расійскай нафты носяць палітычны характар і робяцца для таго, каб «трымаць расійскі бок у тонусе», перакананыя эксперты, якіх апытала ТАСС.
«Калі даць Беларусі кампенсацыі страт з-за падатковага манеўру, то тады трэба даваць усім, хто ўваходзіць у ЕАЭС, альбо трэба выбудоўваць з Беларуссю больш цесныя юрыдычныя адносіны і саюзную дзяржаву наступным этапам», — рэзюмуе аналітык «Фінама» Аляксей Калачоў.
Эксперты не бачаць эканамічных падстаў для нейкіх кампенсацый Беларусі з-за падатковага манеўру.
НСН: Лукашэнка грубіяніць, а Масква церпіць
Лідар Беларусі гуляе ў сваю ўласную гульню, у якой хоча дагадзіць і Расіі, і Захаду. Такое меркаванне ў эфіры НСН выказаў першы намеснік кіраўніка камітэта Дзярждумы па справах СНД, еўразійскай інтэграцыі і сувязях з суайчыннікамі Канстанцін Затулін. Паводле яго слоў, Лукашэнка сёння забывае аб тым, як будаваў далёкія планы па пытанні інтэграцыі з Масквой.
«Лукашэнка хоча выкарыстаць сітуацыю, у якой аказалася Расія ў выніку санкцый і, па сутнасці, канфрантацыі з Захадам. Ён разлічвае, што яго непрымірымая пазіцыя дасць яму новыя дывідэнды і ў Расіі, і на Захадзе. Гэта значыць, ён сёння цалкам адмаўляе сябе самога 90-х гадоў, калі ён казаў пра аб'яднанне аж да зліцця дзвюх дзяржаў і падпісваў дамову аб Саюзнай дзяржаве. Цяпер ён спрабуе пра гэта забыць. Ён засвоіў пэўную тактыку: упіраючы на расійска-беларускія адносіны і іх блізкасць, патрабуе ад Расіі эканамічных саступак, і пры гэтым не бярэ на сябе ніякіх вайскова-палітычных абавязацельстваў. Я маю на ўвазе забавязанні падтрымліваць Расію ва ўсіх канфліктах, якія вакол яе ўзнікаюць. Лукашэнка выдатна разумее, што добрая доля яго эканамічнага дабрабыту завязана на яго прывілеі ў адносінах з Расіяй, ён хацеў бы яго захаваць і нарасціць. Пры гэтым ён не саромеецца выказвацца на адрас Расіі, змагацца з уяўнай альбо сапраўднай пагрозай з яе боку — зліцця і гэтак далей. Па сутнасці, ён не дае магчымасці прасунуць інтэграцыю Расіі з Беларуссю на наступны ўзровень», — заўважыў Затулін.
Сённяшняя рыторыка Мінска, аднак, не стварае пагрозы расійска-беларускім адносінам, дадаў суразмоўца НСН. Нягледзячы на тое, што Лукашэнка даўно гуляе па краі, сітуацыя склалася такім чынам, што і Масква гатовая пацярпець, і сам Лукашэнка не стане ісці супраць хаўрусніка да канца.
«Небяспека, што Лукашэнка загуляўся, існуе, але я думаю, што да гэтага яшчэ далёка. Нельга сказаць, што ён перайшоў нейкую мяжу», — адзначыў Затулін.
Коммерсант: Альтэрнатывы расійскай нафце няма
У Беларусі сапраўды ёсць альтэрнатыўныя варыянты пастаўкі нафты ў краіну, і ў перспектыве яны нават больш выгадныя, чым працяг супрацоўніцтва з Расіяй, лічыць партнёр кансалтынгавай кампаніі RusEnergy, эксперт па нафце і газу Міхаіл Круціхін, піша «Коммерсант». Аднак выгаднымі яны стануць толькі тады, калі адбудзецца завяршэнне расійскага падатковага манеўру і ўрэшце знікне экспартная пошліна. Тады расійская нафта для Беларусі стане даражэйшай, і не выключана, што пастаўкі іншай нафты праз тэрыторыю суседняй Літвы будуць камерцыйна такімі ж эфектыўнымі або нават, можа быць, лепшымі, чым пастаўкі з расійскай тэрыторыі.
«Падобныя пастаўкі былі з Азербайджана, Венесуэлы, адкуль паставілі 2 млн т, і на гэтым усё скончылася, бо аказалася зусім нерэнтабельна.
Таму з пункту гледжання эканамічнай эфектыўнасці і рэнтабельнасці паставак альтэрнатывы расійскай нафце няма.
Але праблема ў тым, што цяпер Лукашэнка такімі сігналамі спрабуе вытаргаваць для сябе прэферэнцыі, таму што ў яго цяжкая сітуацыя з найбліжэйшымі выбарамі, і ён спрабуе атрымаць для сябе максімальную выгаду», — сказаў «Коммерсанту» Дзмітрый Балкунец.
Царьград: Расія «ўвагнала ў Беларусь 126 мільярдаў», і цяпер Бабіч фарміруе «баявую групу»
Палітолаг Андрэй Суздальцаў у гутарцы з Царьградам распавёў, што на 1 студзеня 2019 года Расія нібыта «ўвагнала ў Беларусь 126 мільярдаў» і «прыйшоў час разабрацца». На думку эксперта, цяпер Бабіч фарміруе «баявую групу».
Эксперт падкрэсліў, што нібыта ніколі Беларусь не была саюзнікам Расіі.
Цяпер Бабіч, як лічыць палітолаг, фарміруе «баявую групу». Эксперт адзначыў, што апошнія 12 гадоў расійскае пасольства ў Беларусі нібыта было вельмі пасіўным.
«Таму Бабіч прыйшоў у чыстае поле, і ён там фарміруе вельмі баявую групу, якая спрабуе адстойваць інтарэсы Расіі ў Беларусі»,
— рэзюмаваў Суздальцаў.
BFM.RU: Гісторыя, якую мы бачым рэгулярна з боку Беларусі
Вядучы аналітык Фонду нацыянальнай энергабяспекі Ігар Юшкоў у інтэрв'ю BFM.RU заявіў, што нічога новага ў сітуацыі з пошукам Беларуссю новай нафты няма.
«Гісторыя, якую мы бачым рэгулярна з боку Беларусі. Гэта закупы нафты з Казахстана і Азербайджана, і нават пагроза закупаў нафты з Ірана. Пастаянна схема адна і тая ж: давайце мы будзем у кагосьці закупляць, Расія ад гэтага недаатрымае грошай і пагодзіцца на беларускія ўмовы па якіх-небудзь там пагадненнях і перамовах. У рэальнасці Беларусі ўсе могуць прадаць нафту. Гэта не праблема — яе купіць на сусветным рынку. Але гэта будзе даражэй, чым у Расіі», — сказаў Юшкоў.
Блогер Эль Мюрыд: Лукашэнка паступова вызначаецца ў сітуацыі, у якую яго паспрабаваў загнаць Пуцін
Лукашэнка, падобна, паступова вызначаецца ў сітуацыі, у якую яго паспрабаваў загнаць Пуцін, лічыць папулярны расійскі блогер Эль Мюрыд.
Сам сабою механізм прапанаваных Пуціным мерапрыемстваў у дачыненні да Беларусі даволі прымітыўны, як і ўся расійская знешняя палітыка, лічыць блогер. Мы вам — кампенсацыі, вы — палітычныя саступкі. Пад саступкамі разумеецца адмова ад суверэнітэту і паскоранае стварэнне Саюзнай дзяржавы, якое дазволіць Пуціну яшчэ два тэрміны быць першай асобай.
«Беларусы спачатку не зарыентаваліся, але атрымаўшы паўзу, прыйшлі да высновы, што на палітычны шантаж трэба адказваць сіметрычна — палітычнымі рашэннямі. Лукашэнка быў выключна адкрыты»,
— піша Эль Мюрыд.
Фактычна гэта адказ на выстаўлены ўльтыматум, цяпер усё залежыць ад Крамля, упэўнены блогер.
