Міністр адукацыі: У Беларусі не памыліліся, адмовіўшыся ад экзаменаў у пятыя класы гімназій
У Беларусі не памыліліся, адмовіўшыся ад адбору школьнікаў у пятыя класы гімназій па выніках экзаменаў, заявіў міністр адукацыі Ігар Карпенка у інтэрв'ю праграме «Тыдзень» тэлеканала СТБ.
«Мы ўпэўненыя ў гэтым рашэнні. Хто сёння кажа, што трэба выбудаваць сістэму адбору больш матываваных, больш таленавітых дзяцей і для гэтага адзіны спосаб — экзамен, крывіць душой. Сёння любы добры педагог бачыць дзяцей, наколькі яно праяўляе сябе, наколькі мае цягу да таго ці іншага прадмету. Атэстацыя — толькі нязначная частка, якая ў пэўнай ступені паказвае нейкі вынік», — адзначыў Карпенка.
Ён дадаў, што варта ў сістэме агульнай сярэдняй адукацыі стварыць «сістэму роўных магчымасцяў для ўсіх дзяцей», навучэнцаў і ў малакамплектнай сельскай школе, і ў ліцэях і гімназіях Мінска.
«Не сказаў бы, што быў вялікі ажыятаж (вакол паступлення ў гімназіі). Нават у Мінску не было глабальных праблем, звароты да нас былі адзінкавыя і вырашаліся ў працэсе паступлення. Год-два, і гэтая тэма сыдзе з навіннай паласы. Фактычна мы зраўнялі магчымасці для вывучэння на павышаным узроўні прадметаў для агульнаадукацыйных школ і гімназій», — рэзюмаваў міністр.
