Насельніцтва Кітая скарацілася ўпершыню за 70 гадоў
Wikimedia Commons
У 2018 годзе насельніцтва Кітая скарацілася на 1,27 мільёна. Пра гэта паведамляе Agence France-Presse.
Эканаміст Су Цзянь з Пекінскага ўніверсітэта і спецыяліст па нараджальнасці І Фусянь з Вісконсінскага ўніверсітэта ў Мэдысане (ЗША) прыйшлі да такой высновы пасля вывучэння статыстыкі Дзяржаўнага камітэта па справах аховы здароўя і планавага дзетараджэння КНР і іншых агульнадаступных дадзеных.
Навукоўцы падлічылі, што колькасць дзяцей, якія нарадзіліся ў Кітаі, упала на 2,5 мільёна ў параўнанні з 2017 годам. Чакалася, што гэты паказчык вырасце на 790 тысяч.
У Кітаі скарачэнне насельніцтва зафіксавана ўпершыню за 70 гадоў. На думку І Фусяня, гэтая тэндэнцыя можа стаць незваротнай. Ён звязвае падзенне нараджальнасці з памяншэннем колькасці жанчын дзетароднага ўзросту і нежаданнем заводзіць дзяцей з-за выдаткаў на адукацыю, жыллё і медыцынскую дапамогу.
У Кітаі цяпер жыве 1 млрд 393 мільёны чалавек, у Індыі — 1 млрд 359 млн, у ЗША — 330 млн, у Інданезіі — 269 млн.