Беларуска знайшла ва ўпакоўцы семак мёртвага вераб'я: «Стала адсыпаць — з пакета паказаліся ногі птушкі»
«Разарвала пакет і стала з яго пакрыху адсыпаць семкі, але потым адтуль паказаліся лапкі птушкі. Самае жудаснае, што я ўжо палову семак адтуль паспела з'есці», — успамінае гамяльчанка Яўгенія, якая запэўнівае, што знайшла ва ўпакоўцы семак мёртвага вераб'я. Вытворца ж кажа, што чыста тэхнічна такі буйны аб'ект у цэху трапіць у пакет не можа.
Фота Яўгеніі Самойлік.
Яўгенія Самойлік жыве ў Гомелі, яна даслала ў рэдакцыю TUT.BY фатаграфію вераб'я, якога знайшла ва ўпакоўцы семак.
— Купляла гэтыя семечкі ў «Еўраопце» на вуліцы Хатаевіча ў Гомелі 27 снежня. Пакунак вялікі — на 400 грамаў. 31 снежня дастала пакет і стала з яго пакрыху адсыпаць семкі, але потым з пакета паказаліся лапкі, — успамінае Яўгенія. — Самае жудаснае, што я ўжо палову семак адтуль паспела з'есці. Цяпер перажываю, каб нічым не заразілася.
Гамяльчанка распавядае, што ў той жа дзень напісала электронныя лісты ў Рэспубліканскі цэнтр гігіены і эпідэміялогіі (адказу пакуль няма), а яшчэ — вытворцу, адрас якога быў пазначаны на ўпакоўцы.
Учора, 3 студзеня, дзяўчына аднесла пакет у краму.
— Там адрэагавалі адэкватна, самі былі ў шоку, сказалі, што будуць разбірацца, і грошы за семкі вярнулі, — распавядае Яўгенія.
Чытачка дадае, што не заўважыла, каб ўпакоўка семак была парушаная — яна была шчыльна запаяная, як заўсёды.
— Калі гэта чыйсці дурны жарт — то пажартавалі з усіх, у тым ліку з мяне. У мяне няма мэты кагосьці ачарніць, прадстаўнікі вытворцы ветліва са мной размаўляюць, прапануюць кампенсацыю. Але разам з тым я разумею, што верабей у семках — гэта ненармальная сітуацыя.
На здымку ад чытачкі — упакоўка семак кампаніі «Нікіцін», вытворчасць знаходзіцца ў Лагойску Мінскай вобласці. Там запэўніваюць: не можа быць, каб падчас вытворчасці ў пакет трапіў верабей.
— Чыста тэхнічна такі буйны аб'ект патрапіць у пакет не можа, — расказваюць на прадпрыемстве. — Мы атрымліваем сыравіну, абсмажваем яе, потым семкі ссыпаем у кантэйнеры, пасля чаго ўсё ідзе ва ўпаковачны цэх. Там семкі ссыпаюць у бункер.
Кампанія даслала фатаграфіі абсталявання для ўпакоўкі семак.
Фота прадстаўлена кампаніяй «Нікіцін».
— Гэта бункер, куды трапляюць прапражаныя семкі. Там краты, праз якія ніякі буйны прадмет не пройдзе. Сетка прывараная, яна не падымаецца. За кратамі — труба з дазатарам, які адмярае порцыю семак, на гэтую трубу надзяваюць упаковачнае «рукаво». Знізу «рукаво» запайваецца, дазатар адсыпае ў трубу семкі, гатовую ўпакоўку запайваюць і адсякаюць.
— Труба шырокая?
— Яе дыяметр не шырэйшы за далонь. Нават калі б у такую трубу трапіла жывая птушка, яна б там білася, усё роўна хтосьці б пачуў — напрыклад, работнік, які пакуе. Мёртвая ж птушка туды наогул ніяк не можа патрапіць.
— Але гіпатэтычна доступ знізу да трубы ёсць?
— Толькі ў момант надзявання плёнкі, але гэта секундная справа. Каб птушка туды заляцела і ніхто гэтага не заўважыў — такога не можа быць. Мы ўсё праверылі, у нас наогул няма птушак на вытворчасці. Пры ўпакоўцы заўсёды прысутнічае ўпакоўшчык, які акуратна выкладвае гатовыя пачкі ў скрыню, каб яны мелі таварны выгляд, сочыць, каб не было дрэнна запаяных пакетаў. Труба, на якую нацягваецца плёнка, знаходзіцца ў скрыні з аргшкла прыкладна як на відэа, але ў нас абсталяванне значна сучаснейшае за гэта.
Фота прадстаўлена кампаніяй «Нікіцін».
У кампаніі лічаць, што хтосьці спрабуе дыскрэдытаваць іх прадукцыю. Што тычыцца чытачкі, з ёй да публікацыі гэтага артыкула прадстаўнікі кампаніі «Нікіцін» ужо звязваліся.
— Наша кампанія ў любым выпадку вельмі шкадуе, што гэта адбылося з чытачкай, са свайго боку, мы ўжо сустрэліся з ёй і прынеслі ёй свае шчырыя прабачэнні. Тэхнічнай службе загадана яшчэ раз пераправерыць нават фізічна немагчымыя варыянты.
