У Беларусі выбіраюць імя ваўку-адзінцу з Палесся
vouk.by
Напрыканцы мінулага года грамадская арганізацыя «Ахова птушак Бацькаўшчыны» (АПБ) у межах навуковых даследаванняў пазначыла GPS-ашыйнікамі двух ваўкоў на Палессі. Прапанаваць імя для аднаго з шэрых драпежнікаў можа кожны, паведамляе АПБ.
Для гэтага трэба запоўніць невялікую анкету ці пакінуць каментар на старонках праекта ў фэйсбуку, інстаграме альбо УКантакце. Імя ваўку абяруць 10 лютага.
Новы герой — дарослы воўк-адзінец. Яму тры гады, а гэта час дысперсіі (рассялення), калі самцы пакідаюць зграю і пачынаюць шукаць лепшага жыцця.
У месцы, дзе ён жыве, ужо ёсць ваўчыная зграя, аднак ён да яе не належыць. Магчыма, зграя яго не прымае. А магчыма, яму самому нешта не падабаецца ў ёй.
Самотнаму ваўку вельмі складана паляваць зімой, таму сілкуецца ён выключна падлай.
Як выберуць імя для другой ваўчыцы, АПБ раскажа 8 студзеня.