Ідэолаг з 2000-х: Аўтары падручнікаў угледжваюць нейкую пазітыўную ролю фантомнай БНР у станаўленні беларускай дзяржаўнасці
У рэдакцыі газеты «СБ. Беларусь сёння» прайшоў круглы стол, прысвечаны 100-годдзю БССР. Мадэратарам быў дэкан факультэта філасофіі і сацыяльных навук Вадзім Гігін.
Сярод удзельнікаў сустрэчы быў доктар палітычных навук Уладзімір Мельнік. Ён выявіўся адзіным рашучым праціўнікам БНР.
Уладзімір Мельнік, фота Sb.by
«Скажам прама: была б абвешчаная БНР ці не, беларускія мужыкі пад нямецкай акупацыяй як плялі кошыкі, так і працягвалі б іх плесці», — мяркуе Мельнік.
«Гэта падзея [100-годдзе БССР] павінна заняць годнае месца ў медыясферы. Перакананы, што ўвесь журналісцкі корпус павінен працаваць на Рэспубліку Беларусь і абарону яе гісторыі. А не праводзіць нейкія прыватныя інтарэсы ў гэтым пытанні.
Варта паглядзець і на падручнікі, аўтары якіх усё яшчэ спрабуюць ўгледжваць нейкую пазітыўную ролю фантомнай БНР у станаўленні беларускай дзяржаўнасці»,
— падсумаваў ён.
Хто такі Мельнік? 74-гадовы прафесар працуе ў Акадэміі кіравання, перад тым больш за 20 гадоў выкладаў у Акадэміі МУС. У 2000-ыя ён напісаў некалькі навучальных праграм па паліталогіі, а таксама быў аўтарам падручнікаў «Асновы ідэалогіі беларускай дзяржавы».