Пад Смаленскам Fiat з беларусамі вынесла пад фуры: дзве жанчыны загінулі, кіроўца ў рэанімацыі
Фота ДІБДР па Смаленскай вобласці
Смяротная аварыя адбылася 17 снежня, каля 17.05, на 374-м кіламетры трасы Масква — Мінск. 55-гадовы кіроўца Fiat ехаў у напрамку Мінска, не абраў бяспечную хуткасць руху, не справіўся з кіраваннем і выехаў на паласу сустрэчнага руху, дзе сутыкнуўся з двюма фурамі Mercedes.
У следчым упраўленні міліцыі па Смаленскай вобласці распавялі, што кіроўца Fiat спрабаваў сысці ад сутыкнення з жывёлай, якая раптоўна выбегла на дарогу.
У выніку ДТЗ дзве пасажыркі легкавіка (65 і 58 гадоў) ад атрыманых траўмаў памерлі на месцы здарэння. Кіроўца Fiat з цяжкімі траўмамі шпіталізаваны ў рэанімацыйнае аддзяленне бальніцы.
Як паведамілі ў пасольстве Беларусі ў Расіі, загінулыя жанчыны і пацярпелы мужчына - грамадзяне Беларусі. Пасольства робіць захады па інфармаванні іх сваякоў.
