Навукоўцы навучыліся адрошчваць пашкоджаныя зубы
Пра гэта паведамляе Newsweek.
Фота Depositphotos/DmitryPoch
Навукоўцы вынайшлі пломбу, якая не толькі закрывае дзірку ў зубе, але і аднаўляе яго фактуру.
Напаўняльнік стымулюе ствалавыя клеткі, а тыя, у сваю чаргу стымулююць рост дэнціну — касцявога матэрыялу, з якога складаецца вялікая частка зуба.
Над распрацоўкай метаду працавалі даследчыкі з Нотынгемскага і Гарвардскага ўніверсітэта.
Навукоўцы кажуць, гэта значны крок наперад у сучасных метадах лячэння захворванняў зубоў.
«Наяўныя стаматалагічныя напаўняльнікі таксічныя для клетак, а таму несумяшчальныя з тканкамі пульпы ўнутры зуба»,
— тлумачыць Адам Тэліз, навуковы супрацоўнік Нотынгемскага ўніверсітэта.
«Гэты сінтэтычны біяматэрыял можна размяшчаць у непасрэдным кантакце з тканкамі пульпы»,
— дадае вучоны.
Такі метад лячэння атрымаў прыз ад Каралеўскага таварыства па хіміі. Суддзі назвалі яго «новай парадыгмай стаматалагічных працэдур».
Зараз навукоўцы шукаюць партнёраў-вытворцаў, якія маглі б рабіць такі напаўняльнік і зрабіць яго даступным.
