Лукашэнка — нямецкаму паслу: Вы плот пабудавалі і нікога да яго не падпускаеце. Горш чым у Трампа з Мексікай
Мы ніколі не будзем праблемай для Еўрапейскага саюза, у тым ліку і для Нямеччыны, кажа кіраўнік краіны.
Пра гэта ён заявіў сёння на сустрэчы з паслом Нямеччыны Петэрам Дэтмарам, піша БелТА.
Лукашэнка адзначыў, што Беларусь можа пайсці насустрач у пэўных пытаннях, але не ва ўсіх.
«Адзінае хачу сказаць, каб Нямеччына — хоць немцы гэта разумеюць — ніколі не ставіла нас перад выбарам. Вось амерыканцы гэта зразумелі. Размаўляў нядаўна з памочнікам дзяржсакратара, і ён мне проста сказаў: «Мы не хочам ставіць Беларусь перад выбарам: вы з Усходам ці вы з Захадам». Мы там, дзе мы ёсць. Госпадам Богам гэта вызначана, і штурхаць нас туды-сюды не трэба. Мы зыходзячы з нацыянальных інтарэсаў, інтарэсаў нашых суседзяў будзем будаваць нашу мірную палітыку. Мы ніколі не станем ачагом напружанасці ў Еўропе», — заявіў ён.
«Нам больш ніякіх войнаў не трэба. Напэўна, таму Нямеччына імкнецца ў любым пункце паспрабаваць урэгуляваць нейкія канфлікты мірным шляхам. Мы таксама гэтага хочам. Таму мы ніколі не будзем праблемай для Еўрапейскага саюза, у тым ліку і для Нямеччыны.
Таго ж самага мы хацелі б і ад Нямеччыны: мы хочам, каб Нямеччына, разумеючы нас, рабіла пэўныя крокі насустрач», — падкрэсліў беларускі кіраўнік.
Лукашэнка ўказаў на праблемы ў гандлёвых адносінах паміж краінамі:
«Вы плот пабудавалі і нават да плота нікога не падпускаеце. Горш чым у Трампа з Мексікай сцяна пабудаваная, толькі яна нябачная, эканамічная. Таму мы хацелі б нарэшце зняць гэты плот. Калі Еўрапейскі саюз такі прыхільнік рынкавай эканомікі, чаго тады агароджвацца?»