12 снежня ў «Акадэмкнізе» — прэзентацыя кнігі Мойшэ Кульбака «Панядзелак»
«Акадэмічная кніга» (пр.Незалежнасці, 72). Пачатак а 18-й.
Мойшэ Кульбак. Панядзелак. Маленькі раман. — Прага: Вясна, 2018. Пераклад з ідышу Сяргей Шупа.
У рамане апісваюцца падзеі часоў расейскай рэвалюцыі ў нейкім дастаткова буйным, але дакладна не акрэсленым горадзе. Сам аўтар у тыя часы жыў у Мінску і Вільні.
«Калі меркаваць па «Панядзелку» Мойшэ Кульбака, то ў сучаснай яму беларускай літаратуры 20-х гадоў не было ні такога голасу, ні такой інтанацыі, ні такога філасафічнага задумення над жыццём, — кажа літаратуразнаўца і перакладчык Ян Максімюк. —
Невялікі раман пра «рэвалюцыйны горад, што размясціўся сярод гор» здзіўляе сваёй рэфлексіўнасцю і заклікам да захавання свайго прыватнага свету і незалежнасці ў навальніцы часу. Працэс пазнання адбываецца не праз актыўнасць, а праз пасіўнае быццё, цвердзіць галоўны герой «Панядзелка». І ўдакладняе: кот адчувае сваё быццё не тады, калі разрывае кіпцямі здабычу, а тады, калі грэецца на сонцы.
Зусім нечаканая кніжка, выцягнутая беларускім перакладчыкам з цёмнай кладоўкі забыцця. Кніжка, у якой 30-гадовы аўтар дзеліцца досведам 60-гадовага».
