У Арменіі абверглі словы Лукашэнкі: Наша пазіцыя па АДКБ не змянілася
Прэс-сакратар прэм'ер-міністра Арменіі Нікола Пашыняна Арман Егаян абверг агенцтву «Новости-Армения» заяву Аляксандра Лукашэнкі.
У чацвер Лукашэнка ў кулуарах Вышэйшага Еўразійскага эканамічнага савета ў Санкт-Пецярбургу заявіў журналістам, што пост генеральнага сакратара АДКБ пяройдзе да Беларусі.
Чытайце таксама: Лукашэнка: Мы вырашылі праблему прызначэння генеральнага сакратара АДКБ. Ім будзе беларус
«Як вядома, пасяджэння АДКБ не было. Пазіцыя Арменіі ў гэтым пытанні не змянілася», — сказаў Егаян.
У адносінах паміж Арменіяй і краінамі АДКБ некалькі тыдняў таму паўстала напружанасць пасля адклікання Ерэванам 30 кастрычніка свайго прадстаўніка Юрыя Хачатурава з пасады генеральнага сакратара АДКБ без папярэдняга ўзгаднення гэтых працэдур з іншымі партнёрамі па Арганізацыі.
Арменія, якая з'яўляецца дзеючым старшынёй АДКБ настойвае на прызначэнні свайго прадстаўніка, паколькі Юрый Хачатураў адпрацаваў толькі палову са звычайных трох гадоў (тэрмін паўнамоцтваў армянскага боку мінае ў 2020 годзе). З гэтым не згодны, у прыватнасці, Аляксандр Лукашэнка, які прапанаваў перадаць паўнамоцтвы генеральнага сакратара АДКБ Беларусі.
