Затрыманы актывіст Яўген Афнагель. Яго абвінавачваюць у крадзяжы
Яўген Афнагель — каардынатар кампаніі «Еўрапейская Беларусь»
Жонка Яўгена Афнагеля Кацярына Людвіг паведаміла ў каментары Charter97.org, што яны з мужам ездзілі на рынак будаўнічых матэрыялаў. А калі вярталіся назад, купіўшы ўсё неабходнае, іх машыну спынілі супрацоўнікі ДАІ. Пасля гэтага з засады выскачылі сілавікі, якія прадставіліся супрацоўнікамі крымінальнага вышуку. Яны сталі здымаць затрыманне на відэакамеру.
Чытайце таксама: Яўген Афнагель выйшаў на свабоду
Пасля гэтага асобы, якія назваліся супрацоўнікамі крымінальнага вышуку, селі ў машыну і загадалі ехаць у Бараўлянскі аддзел УУС Мінскага раёна.
Там Яўгена Афнагеля затрымалі, яго абвінавачваюць у крадзяжы тавараў, набытых на рынку, сцвярджае жонка.
Па словах Кацярыны Людвіг, у аддзел міліцыі прывезлі прадпрымальніка, у якога яны купілі тавары.
У міліцыі пацвердзілі, што Афнагель знаходзіцца ў іх, але падрабязнасці не агучылі.
