«Некаторымі нашымі гісторыкамі павінен займацца КДБ». Краўцэвіч адказвае Марзалюку
Прапановы гісторыка Ігара Марзалюка па фарміраванні «патрыятычнага стаўлення да Айчыны» гісторык Алесь Краўцэвіч на Белсаце назваў «балбатнёю».
Доктар гістарычных навук, дэпутат Палаты прадстаўнікоў Ігар Марзалюк у тэксце «Як пабудаваць цытадэль праўды», апублікаваным у газеце «СБ. Беларусь сегодня», заявіў, што «вывучэнне айчыннай гісторыі з’яўляецца адным з галоўных прыярытэтаў дзяржаўнай палітыкі», ды прапанаваў увесці ў беларускіх універсітэтах курс «Гісторыя дзяржаўнасці».
Чытайце таксама:
Марзалюк: Неабходна стварыць Інстытут нацыянальнай памяці, каб адсочваць гістарычную палітыку суседзяў і апанентаў
Таксама Марзалюк прапануе правесці Кангрэс беларускіх гісторыкаў — з прыцягненнем усіх найважнейшых даследчыкаў нашай краіны.
На думку Алеся Краўцэвіча, гэтыя ідэі слушныя, але рэалізаваць іх у сённяшняй Беларусі немагчыма, бо ў аснове кансэнсусу беларускіх гісторыкаў павінны быць нацыянальныя інтарэсы нашага народа, а ў беларускіх вучэльнях працуюць некаторыя спецыялісты, погляды якіх з гэтым нацыянальным інтарэсам не супадаюць.
«У Нямеччыне забаронена хваліць Гітлера — гэта крымінальна караецца. А ў Гарадзенскім універсітэце можа быць так, што прафесар працуе 40 гадоў, есць беларускі хлеб і выступае супраць беларускай дзяржаўнасці ў гісторыі. Так не павінна быць. Ім павінен займацца КДБ — за дзейнасць супраць беларускай дзяржавы, — заяўляе Краўцэвіч. — Такога немагчыма ўявіць сабе ў Літве, ува Украіне, у Польшчы: там ёсць кансэнсус — нацыянальныя інтарэсы. А ў нас частка афіцыёзных гісторыкаў працуе з пункту гледжання інтарэсаў іншага народа — Расеі. Гэта недапушчальна. Гэта павінна спыняцца нават крымінальным пераследам».
Прычыну з’яўлення тэксту Марзалюка Краўцэвіч бачыць у тым, што афіцыёзныя гісторыкі пачынаюць прайграваць незалежным навукоўцам.
Суразмоўца «Белсата» прызнаецца, што на прапанову з боку дзяржавы ўзяць удзел у распрацоўцы агульнай канцэпцыі беларускай гісторыі ён бы пагадзіўся.
«Беларусь — наша краіна. Гэтая ўлада абавязаная на нас працаваць, — заяўляе Краўцэвіч. — Калі дзякуючы гэтым дамовам мне ўдасца вымусіць надрукаваць сапраўды беларускі падручнік, калі ўдасца паставіць помнік Касцюшку або Каліноўскаму, калі ўдасца прыбраць помнік Калініну — я на гэта пайду».
