У Мінску стартавала рэкорднае дзіцячае «Еўрабачанне» — беларус Даніэль Ястрэмбскі заспявае пад №8
Урачыстая цырымонія адкрыцця міжнароднага дзіцячага конкурсу песні «Еўрабачанне 2018.» прайшла ў Нацыянальным выставачным цэнтры «БелЭкспа» ў Мінску, перадае БелТА.
Цырымонія стартавала з чырвонай дывановай дарожкі, па якой прайшлі ўсе 20 дэлегацый краін-удзельніц. Гэта першая сустрэча ўсіх канкурсантаў, якія змаглі прэзентаваць сябе і сваю каманду.
У адкрыцці ўзялі ўдзел больш як 300 чалавек.
Згодна з правіламі Еўрапейскага вяшчальнага саюза, падчас афіцыйнай цырымоніі адкрыцця конкурсу праходзіць лёсаванне. Разыгрываюць першую і апошнюю пазіцыі. Адкрые шоу ўдзельнік з Украіны. Апошняя кампазіцыя прагучыць у выкананні прадстаўніцы Польшчы.
Свой нумар на адкрыцці даведваецца і прадстаўнік краіны — гаспадыні конкурсу. Беларус Даніэль Ястрэмскі на дзіцячым «Еўрабачанні» выступіць пад нумарам 8.
Дзіцячае «Еўрабачанне 2018.» у Мінску паставіла рэкорд па колькасці ўдзельнікаў. Два дзесяткі выканаўцаў у гэтым фармаце не спаборнічалі яшчэ ні разу.
Фінал міжнароднага дзіцячага конкурсу песні «Еўрабачанне 2018» пройдзе ў Беларусі 25 лістапада.
