У Чыкага ліфт з пасажырамі сарваўся з 95-га паверха. Але своечасова спыніўся на 11-м
Ліфт з шасцю пасажырамі сарваўся з 95-га паверха Хэнкок-цэнтра ў амерыканскім Чыкага. Пра гэта паведамляе CBS Chicago.
Інцыдэнт адбыўся яшчэ 16 лістапада. Пасля таго як адзін з тросаў абарваўся, ліфт пачаў спускацца на вялікай хуткасці і спыніўся толькі ў раёне 11 паверха. Дадатковыя тросы вытрымалі яго вагу, таму ў выніку ніхто не пацярпеў. У ліку пасажыраў была цяжарная жанчына.
Да прыбыцця экстраных службаў людзі, якія знаходзіліся ў ліфце, не ведалі, на якім паверсе яны затрымаліся. Праз няпростую канструкцыю шахт будынка ратавальнікі доўга не маглі дабрацца да кабіны: ім прыйшлося ламаць бетонную сцяну з дапамогай молата. У выніку аперацыя доўжылася больш за тры гадзіны.
«Спачатку я думаў, што мы загінем», — заявіў CBS Chicago адзін з пасажыраў, мексіканскі турыст Хайме Монтэмаёр. Паводле яго слоў, ліфт стаў рухацца значна хутчэй, што адчувалася як падзенне, а затым ён пачуў нейкі гук. Яго жонка распавяла, што пры гэтым кабіна напоўнілася пылам.
