У снежні беларусаў чакаюць дзве працоўныя суботы і два выходныя панядзелкі
Суботы — 1, 8 і 15 снежня — будуць выходнымі. А вось далей нас чакаюць пераносы.
Фота Волі Афіцэравай
25 снежня, аўторак, у Беларусі святкуецца каталіцка-пратэстанцкае Раство, таму працоўны дзень з 24 снежня будзе перанесены на 22 снежня.
У гэтым выпадку беларусаў чакаюць тры выходныя: з 23 па 25 снежня (нядзеля — аўторак).
1 студзеня 2019 года выпадае на аўторак, таму 31 снежня (панядзелак) таксама будзе выходным. За яго прыйдзецца адпрацаваць у суботу 29 снежня.
Урад яшчэ не вызначыўся з пераносамі працоўных дзён у 2019 годзе. Пакуль не зразумела, ці будзе 2 студзеня выходным.
Улічваючы, што гэты дзень прыпадае на сераду, то тады давядзецца, магчыма, рабіць працоўнай суботу 5 студзеня. Выходнымі будуць тады 6 і 7 студзеня (нядзеля і панядзелак). Або калі 2 студзеня пакінуць працоўным днём, то тады выходнымі будуць тры дні: 5—7 студзеня.
