Дырэктарам «Славянскага базара» стаў 30-гадовы спявак і ветдоктар
Ад 1 лістапада генеральным дырэктарам Цэнтра культуры «Віцебск» і дырэктарам «Славянскага базара» прызначаны Глеб Лапіцкі.
Пра гэта «Нашай ніве» расказала начальнік аддзела культуры Віцебскага гарвыканкама Наталля Шыёнак: «Сапраўды, Глеб Аляксандравіч узначаліў цэнтр культуры «Віцебск». Калі б вы ведалі яго біяграфію, не ўзнікла б ніякіх пытанняў, чаму такую высокую пасаду даверылі такому маладому чалавеку».
Да Лапіцкага «Славянскі базар» ад 2013 года ўзначальваў Аляксандр Сідарэнка, які пакінуў пост месяц таму.
Глеб Лапіцкі нарадзіўся ў 1988 годзе ў Віцебску.
Скончыў Віцебскую дзяржаўную акадэмію ветэрынарнай медыцыны, затым Беларускі дзяржаўны універсітэт культуры і мастацтваў. Цяпер вучыцца ў Акадэміі кіравання.
Да цяперашняга прызначэння працаваў начальнікам галоўнага ўпраўлення па культуры і грамадскай рабоце апарату ў Федэрацыі прафсаюзаў Беларусі. Жанаты, мае дваіх дзяцей.