Дэтэктары маны з'явяцца на мяжы ЕС
Еўрасаюз правядзе выпрабаванні сістэмы iBorderCtrl, якая на працягу шасці месяцаў будзе працаваць на граніцах Венгрыі, Латвіі і Грэцыі з краінамі, якія не ўваходзяць у ЕС. Яна ўяўляе сабой платформу са штучным інтэлектам, мэта якой — паскорыць працэс перасячэння мяжы, перадае theverge.com.
Чалавек зможа папярэдне запоўніць электронныя анкеты і загрузіць неабходныя дакументы, а затым машына задасць пытанні. Адказы на пытанні будуць аналізавацца, і, калі сістэма вырашыць, што ўсё ў парадку, чалавек атрымае QR-код, па якім перасячэ мяжу.
«Што ў вас у чамадане? Калі вы адкрыеце яго і пакажаце, што ўнутры, вашы словы пацвердзяцца?» — прыкладна такія пытанні будзе задаваць штучны інтэлект. Адначасова за чалавекам будзе сачыць сістэма сэнсараў і відэакамеры, якія будць вымяраць шэраг фізіялагічных параметраў, рэакцый, 38 мікражэстаў.
Калі ж машына западозрыць штосьці нядобрае, ад чалавека запатрабуюць падаць дадатковую інфармацыю, а таксама прайсці сканіраванне далоні, твару, адбіткаў. Пасля вас правераць па базах дадзеных і адправяць да жывога інспектара.
iBorderCtrl знаходзіцца на ранніх стадыях тэставання і выдаваць забарону на перасячэнне мяжы пакуль што не зможа. Цяпер праграма мае досыць высокі вынік — 76% паспяховых рашэнняў, аднак распрацоўшчыкі спадзяюцца павысіць яго да 85%.
Віртуальны агент улічвае гендарную, этнічную прыналежнасць падарожніка, а таксама розныя мовы.
