Японскі касмічны апарат з беларускімі экранамі адправіўся даследаваць Меркурый
Шматслойныя электрамагнітныя экраны, створаныя навукоўцамі Навукова-практычнага цэнтра Нацыянальнай акадэміі навук Беларусі па матэрыялазнаўстве, устаноўлены на борце японскага касмічнага апарата Mercury Magnetospheric Orbiter, які ўдзельнічае ў даследчай місіі BepiColombo.
У ноч з 19 на 20 кастрычніка з касмадрома ў Французскай Гвіяне паспяхова стартавала еўрапейская ракета-носьбіт цяжкага класа Ariane-5. У космас яна вывела апараты даследчай місіі BepiColombo, якая падрыхтавана Еўрапейскім касмічным агенцтвам (ESA) сумесна з Японскім агенцтвам аэракасмічных даследаванняў (JAXA) для вывучэння Меркурыя. Электрамагнітную сумяшчальнасць прыбораў унутры навуковага комплексу, у склад якога ўваходзіць высокадакладны магнітометр, на японскім касмічным апараце Mercury Magnetospheric Orbiter забяспечваюць распрацаваныя і вырабленыя ў НПЦ НАН Беларусі па матэрыялазнаўстве шматслойныя электрамагнітныя экраны.
Экраны забяспечваюць высокаэфектыўную абарону мікраэлектронных прыбораў і апаратаў авіяцыйнага і касмічнага прызначэння ад уздзеяння электрамагнітных выпраменьванняў. Электрамагнітныя і іанізуючыя выпраменьванні з'яўляюцца аднымі з асноўных дэстабілізуючы фактараў, якія ўздзейнічаюць на функцыянальнае абсталяванне ракетна-касмічных, авіяцыйных і наземных комплексаў вырабаў двайнога і спецыяльнага прызначэння.
Беларускія вучоныя ўдзельнічаюць у міжнародным касмічным праекце па даследаванні Меркурыя сумесна з Інстытутам касмічных даследаванняў Расійскай акадэміі навук. Як паведамляецца, палёт будзе доўжыцца каля 7 гадоў. Прыбыццё ў раён Меркурыя чакаецца ў снежні 2025 года. Навукоўцы чакаюць, што абедзве станцыі змогуць прапрацаваць у ваколіцах Меркурыя як мінімум год.
