Лукашэнка паставіў задачу выкапаць буракі да Дня кастрычніцкай рэвалюцыі
Аляксандр Лукашэнка сёння на нарадзе паставіў перад аграрыямі жорсткі тэрмін — да 7 лістапада завяршыць усе восеньскія сельгаспрацы, распавёў журналістам віцэ-прэм'ер Міхаіл Русы, піша БелТА.
president.gov.by
Сітуацыі ў сельскай гаспадарцы кіраўнік дзяржавы на нарадзе надаў вельмі вялікую ўвагу, выслухаўшы даклады аб ходзе работ на месцах і ў цэлым па краіне. У цэнтры ўвагі былі пытанні завяршэння восеньскіх сельгасработ і пачатак падрыхтоўкі да пасяўной наступнага года. «Да 7 лістапада — буракі, кукуруза на зерне і кукуруза на сілас», — ахарактарызаваў фронт работ віцэ-прэм'ер.
Як было адзначана на нарадзе, у цэлым тэрміны вытрымліваюцца, і ёсць высокая ступень упэўненасці, што працы завершаць у тэрмін. Аднак Аляксандр Лукашэнка акцэнтаваў увагу на якасці гэтых работ, недапушчальнасці страт і задачы па забеспячэнні захаванасці ўраджаю.
«Сёння гэтая задача была вельмі жорстка пастаўлена і мне, і міністру, і кожнаму губернатару», — падкрэсліў Міхаіл Русы.
