МАЗ выпусціў аўтобус-гармонік са штурхаючым прывадам ФОТЫ
Мінскі аўтамабільны завод выпусціў першы аўтобус вялікай умяшчальнасці са штурхаючым прывадам і найноўшым вузлом сучлянення ад кампаніі Hubner, які яшчэ не выкарыстоўваўся ў свеце. Першынец будзе прадстаўлены на міжнародным аўтобусным салоне Busworld, які пройдзе ў Маскве з 23 па 25 кастрычніка, паведамляе прэс-служба прадпрыемства.
МАЗ 216 стане першым сучлененым беларускім аўтобусам з задняматорнай кампаноўкай. Сілавы прывад будзе знаходзіцца ў хваставой частцы«гармоніка». У выніку інжынеры зрабілі ціхі і прасторны салон, даўшы больш свабоднага месца пасажырам, у тым ліку маці з дзецьмі і маламабільных груп насельніцтва. Новы аўтобус зроблены цалкам нізкапольным - вышыня прыступкі над узроўнем дарогі складае 34 см, а пры выкарыстанні кліранса - 27 см.
Сярод адрозненняў — унікальны вузел сучлянення 24.2 нямецкай фірмы Hubner, які адрозніваецца ад серыйнай версіі 19.5. Упершыню яго апрабуюць якраз на беларускім аўтобусе.
Аўтобус «расцягнуўся» у даўжыню на 18 м пры шырыні ў 2,55 м і вышыні ў 3,1 м.
Унутры прадугледжана 40 сядзенняў, а ўсяго ж у салоне змесціцца каля 170 чалавек.
