Украіна ўвяла квоту 75% украінскай мовы на тэлебачанні
Ад 13 кастрычніка агульнанацыянальныя тэлевізійныя каналы ва Украіне абавязаны 75% свайго эфіру вяшчаць на ўкраінскай мове, мясцовыя тэлекампаніі — 60%.
Завяршыўся гадавы льготны перыяд для тэлевізійнікаў, на працягу якога яны павінны былі павялічыць аб'ёмы вяшчання на дзяржаўнай мове, піша bbc.com.
Закон аб моўных квотах на тэлебачанні быў прыняты Вярхоўнай Радай у маі мінулага года.
Нацыянальная рада па пытаннях тэлебачання і радыёвяшчання запэўнівае, што амаль 100% усіх праграм на агульнанацыянальных і мясцовых тэлеканалах ужо выконваюць нормы закона.
У Данецкай, Луганскай, Харкаўскай абласцях і Кіеве доля ўкраінскай мовы на ТВ дасягнула 85—86%. Адэская вобласць паказала самы нізкі сярэдні фактычны паказчык украінскай мовы на тэлебачанні — 59%, указваецца ў справаздачы Нацсавета.
Па выніках праверкі была аштрафаваная толькі адна тэлекампанія — СТС у Сумах — у якой тыднёвы аб'ём украінамоўных перадач не дацягнуў да 60% і склаў 56%. Сума штрафу — 3442 грн. (каля 285 руб. — НН).
100% украінскай мовы на тэлебачанні зафіксавана ў шасці абласцях — Валынскай, Кіраваградскай, Ровенскай, Чарнігаўскай, Чаркаскай, Хмяльніцкай.
У той жа час руская мова ў тэлеэфіры гучыць у немалых аб'ёмах. Закон прадугледжвае, што ўкраінская павінна гучаць усе выпускі навін. Фільмы павінны дублявацца або мець субтытры на ўкраінскай. Дзяржаўнай мовай павінны гаварыць вядучыя ўсіх тэлепраграм.
Але ўдзельнікі праграм — ці то інфармацыйных, ці то забаўляльных — могуць карыстацца расейскай. На практыцы атрымліваецца, што рускай мовы хапае і далей у эфіры, асабліва ў рускамоўных рэгіёнах.
