Закрыўся рупар расійскага шавінізму «Спутнік і Пагром»
Сайт «Спутнік і Пагром» закрываецца, пра гэта афіцыйна абвесціла ягоная каманда.
Гэта рэсурс, чыя ідэалогія балансавала на мяжы крайняга расійскага імперыялізму і неанацызму.
Аўтары прапагандавалі ідэю «Вялікай Расіі», адмаўляючы ў праве на існаванне асобным народам, што мяжуюць з сучаснай Расіяй.
Напачатку 2017 года сайт быў заблакаваны ў Беларусі пасля экспертызы на наяўнасць экстрэмізму ў тэкстах, яшчэ раней ягоны сталы аўтар «па Беларусі» Кірыл Авяр'янаў быў пазбаўлены беларускага грамадзянства і атрымаў забарону на ўезд у краіну.
Тыповая вокладка «СіП».
Нечакана летась «Спутнік і Пагром» быў заблакаваны і ў Расіі пасля патрабаванняў Казахстана, праз што аўдыторыя сайта рэзка знізілася. А амерыканскія адміністратары разліковай сістэмы, праз якую «СіП» атрымліваў ахвяраванні, адключылі яе.
Такім чынам, сайт стаў яшчэ менш акупляльным і ненаведвальным.
Рэдактары абяцаюць у далейшым стварыць пляцоўку для палітычных абмеркаванняў «без гэбістаў і яўрэістаў, якія лезуць у дыялог».
У сваім развітальным лісце кіраўнікі сайта ставяць сабе ў заслугу тое, што яны заахвоцілі ехаць на «курорты Данбаса» прынамсі 300 сваіх чытачоў.
