Памежнікі адкрылі стральбу па ўкраінцах, якія збіралі журавіны на беларускім баку
На днях блізу ўкраінскай вёскі Дроздынь беларускія памежнікі спынілі прыкладна за 500 метраў ад дзяржаўнай мяжы аднаго ўкраінца без дакументаў. А праз некаторы час у той жа мясцовасці выявілі яшчэ дваіх.
— Убачыўшы памежнікаў, парушальнікі паспрабавалі схавацца. Падчас пераследу вайскоўцы былі вымушаныя зрабіць тры папераджальныя стрэлы з табельнай зброі, — прыводзіць «Медыя-Палессе» словы Міхаіла Бут-Гусаіма, афіцыйнага прадстаўніка пагранатрада Пінска.
Уцекачоў затрымалі, гэта былі ўкраінцы з вёскі Старое Сяло. Супраць іх складзена некалькі пратаколаў, у тым ліку за непадпарадкаванне службовым асобам і незаконнае перасячэнне дзяржаўнай мяжы. Яшчэ мужчын аштрафуюць за няправільны збор журавін — ягады яны збіралі з дапамогай браканьерскіх «ручных камбайнаў».
Усяго за мінулы тыдзень на Століншчыне затрымалі 11 парушальнікаў з Украіны, якія незаконна перасеклі мяжу, збіраючы дзікарослыя ягады і расліны. Яны прыцягнуты да адказнасці і дэпартаваныя з Беларусі на 5 гадоў.