«Пачуваецца блага». Мама беларуса, збітага Какорыным і Мамаевым, распавяла пра яго стан
33-гадовага Віталя Салаўчука даставілі ў бальніцу імя Боткіна ў Маскве ў панядзелак раніцай. На беларуса, які працуе кіроўцам вядучай Першага канала, футбалісты Аляксандр Какорын і Павел Мамаеў напалі ў той момант, калі ён чакаў журналістку.
Фота з фэйсбука Віталя Салаўчука
— Сын у свядомасці, я з ім размаўляла і сёння, і ўчора. Адчувае сябе дрэнна, — распавядае TUT.BY Раіса Іванаўна, мама пацярпелага Віталя Салаўчука. — Дзякуй Богу, што мазгі цэлыя! Я сама медсястра, дачка і зяць — дактары. Для нас самае галоўнае, каб ачуняў.
Беларусу Віталю Салаўчуку 33 гады, ён родам з Маларыты. Як распавядае яго знаёмы, Віталь — былы гандбаліст, два сезоны гуляў у Брэсце, затым працаваў таксістам у Мінску, а гадоў пяць-сем таму пераехаў жыць у Маскву.
— У Віталя выдатны характар, але калі што — трываць не будзе, — адзначае знаёмая Віталя Салаўчука.
У панядзелак раніцай Віталь на стаянцы чакаў пасля эфіру вядучую Першага канала Вольгу Ушакову, у якой працуе кіроўцам. Ушакова вядзе праграму «Добрай раніцы». Менавіта ў гэты момант на беларуса напалі футбалісты Аляксандр Какорын і Павел Мамаеў.
— Калі сына даставілі ў бальніцу, рабілі ўсе працэдуры, у тым ліку МРТ, - удакладняе Раіса Іванаўна.
У Віталя закрытая чэрапна-мазгавая траўма, пералом носа.
Як паведамілі TUT.BY у маскоўскай бальніцы імя Боткіна, маладога чалавека адразу ж даставілі ў аддзяленне нейратраўматалогіі, дзе ён зараз знаходзіцца. Мама збітага беларуса збіраецца прыехаць да яго ў Маскву ў выходныя дні.
— Усё здарылася з 8 да 9 раніцы, не ведаю, хто выклікаў паліцыю і хуткую. Яны пачалі біць пляшкі каля дарагой машыны, аскепкі паляцелі ў аўто, сын проста выйшаў паглядзець: падрапаная машына ці не. Яна каштуе 30 тысяч даляраў або больш, — мяркуе Раіса Іванаўна. — І гэта была нават не заўвага, калі ён нешта там памурлыкаў, то навошта хлопцы такое зрабілі? Ён нават не глядзеў у іх бок! А потым хтосьці стаў біць Віталя, хтосьці — машыну.
