Прадстаўніком Украіны ў мінскай кантактнай групе можа стаць Віктар Юшчанка
Віктар Юшчанка лічыцца фаварытам у барацьбе за пасаду прадстаўніка Кіева ў трохбаковай кантактнай групе па ўрэгуляванні канфлікту на Данбасе, паведамляюць расійскаму «Коммерсанту» крыніцы, якія блізкія да перамоўнага працэсу.
Фото: Wikimedia Commons.
Чытайце таксама: Лукашэнка сустрэўся з Віктарам Юшчанкам. Той прамаўляў па-ўкраінску
Адна з іх адзначыла: «Самы антырасійскі прэзідэнт Украіны можа ўзначаліць украінскую дэлегацыю ў Мінску, і гэта стане праблемай для Расіі. Ён, напрыклад, па-руску без перакладчыка не гаворыць».
Па словах суразмоўцы, разглядаўся таксама варыянт прызначэння Ірыны Герашчанка, якая цяпер узначальвае ўкраінскую дэлегацыю ў гуманітарнай падгрупе, але «варыянт з Віктарам Юшчанкам аптымальны».
Нагадваем, 8 кастрычніка з Віктарам Юшчанкам сустрэўся Аляксандр Лукашэнка. Суразмоўцы «Коммерсанта» ў Кіеве назвалі гэтыя перамовы «агледзінамі, пасля якіх Аляксандр Лукашэнка павінен нефармальна пагадзіцца з прызначэннем Віктара Юшчанкі прадстаўніком Украіны ў трохбаковай кантактнай групе».
Зрэшты, у Кіеве разглядаюць і варыянт адмовы ад мінскага фармату — ці хаця б яго перагляду.
