Лявада-цэнтр: Расіяне губляюць давер да Пуціна, Лаўрова і Шайгу
Прэзідэнт Расіі Уладзімір Пуцін застаецца расійскім палітыкам, якому насельніцтва давярае болей, чым астатнім. Аднак яго рэйтынг падае, адзначаюць сацыёлагі з «Лявада-цэнтра».
У лістападзе 2017 года Пуціну давяралі 59% удзельнікаў апытання. У чэрвені 2018 года — ужо 48%. Сёння — толькі 39%.
Давер расіян таксама падае да міністра абароны Расіі Сяргею Шайгу. 15% зараз супраць 19% у чэрвені 2018 года і 23% год таму. Губляе і кіраўнік МЗС Сяргей Лаўроў. Сёння ён заслугоўвае даверу толькі ў кожнага дзясятага расіяніна (10%). Яшчэ летам гэты паказчык быў 14%. У лістападзе 2017 году — 19%.
Палепшыў свае пазіцыі апазіцыянер Аляксей Навальны. Калі год таму і мінулым летам яму давяраў толькі кожны пяцідзесяты (2%), то цяпер ужо 3% расіян вераць апазіцыянеру. Кожны пяты ўдзельнік апытання заявіў, што палітыкаў, якія заслугоўваюць яго давер, няма зусім.
Разам з тым безумоўным лідарам антырэйтынгу даверу застаецца Дзмітрый Мядзведзеў. Сёння яму «больш за ўсё не давярае» 31% расіян. Год таму такіх было 19%. Следам ідзе Уладзімір Жырыноўскі, колькасць праціўнікаў якога за год вырасла з 18% да 20%. Трэцяе месца займае Уладзімір Пуцін, які павялічыў колькасць тых, хто яму не давярае, за мінулы год удвая. 13% сёння супраць 7% у лістападзе 2017 года. Антырэйтынг чацвёртага ў гэтым спісе — лідара камуністаў Генадзя Зюганава за год не змяніўся — 11%.
Пры гэтым наступныя за лідарам камуністаў апазіцыянеры Рыгор Яўлінскі, Ксенія Сабчак і Аляксей Навальны за год скарацілі колькасць сваіх супернікаў. Лідар «Яблыка» ў тры разы, з 11% год таму да 4% сёння. Ксенія Сабчак — больш чым у тры разы, з 14% да 4%. І Аляксей Навальны таксама утрая. У лістападзе 2017 Навальнаму не давяраў кожны дзясяты рэспандэнт, а сёння толькі 3%.
Раней «Лявада-цэнтр» паведамляў, што давер да прэзідэнта Расіі вярнуўся на ўзровень, які сацыёлагі фіксавалі да анексіі Крыма.
