У Беларусі ўпершыню паўторна перасадзілі сэрца
У Беларусі чалавеку ўпершыню паўторна перасадзілі сэрца, паведаміў БелТА кардыяхірург РНПЦ «Кардыялогія» доктар медыцынскіх навук Сяргей Спірыдонаў.
Мужчыну, якому спатрэбілася паўторная перасадка сэрца, упершыню зрабілі трансплантацыю ў 2013 годзе. Увесь гэты час 42-гадовы Аляксандр Капцюг з Вілейкі жыў паўнавартасным жыццём, працаваў. Нядаўна ў яго пачала развівацца васкулапатыя трансплантанта (ускладненне, якое звязана з пагаршэннем кровазабеспячэння гэтага органа). Медыкі вырашылі зноў перасадзіць новае сэрца, што і было зроблена 23 верасня. Аперацыя прайшла паспяхова. Цяпер мужчыну перавялі ў тэрапеўтычнае аддзяленне.
Рэтрансплантацыя сэрца выканана ў Беларусі ўпершыню. Раней на прасторы былога СССР такія аперацыі рабіў толькі Нацыянальны медыцынскі даследчы цэнтр транспланталогіі і штучных органаў імя акадэміка Шумакова ў Расіі.
За амаль 10 гадоў практыкі ў РНПЦ выканана больш за 300 трансплантацый сэрца. Дзевяцігадовая выжывальнасць — 75%.
