Тры цікавосткі, якіх можна чакаць ад Apple
Амерыканскі вытворца культавых дэвайсаў правядзе ў сераду буйную прэзентацыю.
Кампанія Apple рыхтуецца паказаць 12 верасня чарговыя навінкі. Як звычайна, імпрэза ахутана таямнічасцю і разнастайнымі чуткамі. Вось тры магчымыя цікавосткі, якія (верагодна, але не абавязкова) кампанія можа вынесці на суд публікі:
Разумны гадзіннік з электракардыяграмай
Як чакаецца, смарт-гадзіннік Apple Watch атрымае больш тонкі корпус, а вось цыферблат (ці яго лепей назваць экранам?) будзе павялічаны. Ходзяць чуткі, што ў гадзінніку таксама будзе ўбудаваны адмысловы сэнсар, з дапамогай якога ўладальнік зможа зняць уласную электракардыяграму.
iPhone з дзвюма сімкамі
Не выключана, што з'явіцца мадэль «яблычнага» смартфону з дзвюма сім-картамі. Рэч у тым, што двухсімкавыя апараты вельмі папулярныя ў Азіі, якая з'яўляецца важным і вельмі вялікім рынкам, але Apple пакуль што такіх не вырабляе.
Даражэйшая мадэль iPhone X можа атрымаць яшчэ большы экран. Таксама можа з'явіцца бюджэтная мадэль у розных колерах корпусу, але з меней «наварочаным» дысплеем.
iPad без кнопкі
За апошнія гады тэлефоны Apple згубілі свае фірмовыя кнопкі-гузікі home, што дало магчымасць павялічыць памер экрану. Цалкам верагодна, што такі самы лёс нападкае і планшэты iPad. Зрэшты, не факт — у апошнія гады кампанія часцей прэзентавала планшэты ды камп'ютары на асобнай прэзентацыі ў кастрычніку.
Дарэчы, Apple сцвярджае, што ва ўсім свеце працуе 1,3 мільярда актыўных прыладаў вырабніцтва гэтай кампаніі. Больш за палову выручкі прыносяць продажы iPhone. У апошні час рэалізацыя дэвайсаў Apple пачала запавольвацца, а вось прыбытак ад воблачных сервісаў накшталт магазіну праграмаў App Store, сховішча файлаў iCloud і музычнага сэрвісу Apple Music імкліва расце.
