Адзін з кіраўнікоў Акадэміі навук: Магчыма, іншапланетныя прышэльцы ўжо сярод нас
Кіраўнік апарата Нацыянальнай Акадэміі навук Пятро Віцязь выступіў з палымянай прамовай на XXXI Міжнародным кангрэсе Асацыяцыі ўдзельнікаў касмічных палётаў, які праходзіць у Мінску. У сваім выступе ён не выключыў, што жыццё на Зямлі ўзнікла дзякуючы прышэльцам з космасу.
Пятро Віцязь. Фота belta.by.
«Наша Ніва» паразмаўляла з Пятром Віцязем пра ягоную тэорыю.
«Магчыма, калісьці такое і дакажуць. Я проста лічу, што гэта адна з гіпотэз, якая магчымая. Асабіста я веру ў такое, інакш бы такое не казаў. Тэорыя Дарвіна не пацвярджаецца дадзенымі эвалюцыі, якія вывучаюцца навукоўцамі. Таму я прытрымліваюся іншай тэорыі.
Зямля засялялася не па тэорыі Дарвіна. Я лічу, што гэта было зроблена людзьмі, якія прыехалі з іншых планет. Гэта маё меркаванне асабістае, а не Акадэміі навук», — сказаў Пятро Віцязь.
«Навукоўцы мяркуюць, што такіх планет, як Зямля, у галактыцы больш за сотню. Вы ж чыталі фантастыку? Нават таго ж Бяляева. Мы чыталі яго ў дзяцінстве і захапляліся, а сёння гэта стала часткай нашага жыцця. Так і тут можа быць!» — працягвае навуковец.
Пятро Віцязь кажа, што сам не робіць даследаванні па гэтай тэме, проста мае ўласнае меркаванне: «На многіх скалах маюцца артэфакты, дзе намаляваныя спадарожнікі, касмічныя ракеты, касманаўты ў скафандрах, адкуль яны ўзяліся?
Гэта адзін з доказаў таго, што ў нас на Зямлі пабывалі госці з іншых планет. Ці знаходзяць шкілеты чалавека, якія нашмат большыя за шкілеты звычайных людзей. Кім яны былі? Шмат чаго ёсць…»
«Магчыма, і піраміды егіпецкія іншапланетнікі будавалі. Ёсць шмат загадак чалавецтва, якія не даказаныя да гэтага часу», — распавядае Пятро Віцязь.
Мы спыталі, ці верыць навуковец у тое, што бліжэйшым часам можа адбыцца кантакт зямлян з іншапланетнымі цывілізацыямі? «Чаму не? Канечне, можа быць! Толькі я не ведаю, на якой мове яны будуць гаварыць. А, можа, такі кантакт ужо і быў?» — «Дык можа, яны ўжо сярод нас?» — «Так-так. Можа, яны сярод нас. Усё можа быць».
***
Пятро Віцязь нарадзіўся ў 1936 годзе ў Бярозаўскім раёне Брэсцкай вобласці. Ён вучоны ў галіне распрацоўкі новых матэрыялаў, тэхналогій і машынабудавання. Акадэмік Нацыянальнай акадэміі навук Беларусі (1994), доктар тэхнічных навук (1983), прафесар (1986). Заслужаны дзеяч навукі БССР (1991). Ад 1997 да 2012 быў намеснікам кіраўніка Акадэміі навук.
Апытанка
