Заснавальнік Alibaba сыходзіць на пенсію роўна ў 54 гады
Wikimedia Commons
Заснавальнік кітайскага інтэрнэт-рытэйлера Alibaba Джэк Ма вырашыў сысці з кампаніі 10 верасня. Пра гэта ён паведаміў The New York Times.
У панядзелак мільярдэру споўніцца 54 гады. Таксама ў гэты дзень, 10 верасня ў Кітаі будзе адзначацца Дзень настаўніка. Да заснавання Alibaba Джэк Ма быў настаўнікам англійскай мовы.
Як сцвярджае выданне, Ма сыходзіць на пенсію з-за таго, што ў Кітаі сапсавалася бізнэс-асяроддзе, а дзяржаўныя прадпрыемствы ўсё часцей ўмешваюцца ў працу прыватных кампаній. Пры гэтым NYT адзначае, што Ма застанецца ў савеце дырэктараў Alibaba і будзе настаўляць кіраўніцтва кампаніі. У інтэрв'ю выданню Джэк Ма назваў свой сыход на пенсію «пачаткам новай эры».
Стан Джэка Ма Forbes ацэньваецца ў $ 36,6 млрд. У 1999 годзе ён заснаваў кампанію Alibaba, якая стала адным з найбуйнейшых рытэйлераў свету.
