Беларускія адэпты культу «Звінячыя кедры Расіі» хочуць легалізавацца — іх прыняў віцэ-прэм'ер Русы
На мінулым тыдні дзяржаўнае інфармацыйнае агенцтва БелТА паведаміла пра тое, як прайшоў прыём грамадзян віцэ-прэм'ерам Русым.
«Віцэ-прэм'ер адзначыў, што на гэты момант стаіць пытанне аб вызначэнні юрыдычнага статусу родавых маёнткаў, а таксама аб тым, якую колькасць зямлі неабходна даваць у адпаведнасці з ім. У сваю чаргу арганізатар і ўдзельнік пасялення родавых маёнткаў «Росы» Аляксандр Матруховіч выказаў сваю гатоўнасць да ўдзелу ў распрацоўцы праекта закона», — гаворыцца ў паведамленні.
Людзі, якія прыйшлі на сустрэчу з Русым, хацелі б, каб пад такія маёнткі выдзяляўся 1 гектар зямлі замест 15 сотак, як ёсць цяпер.
Што ў гэтай сустрэчы незвычайнага? Тут ёсць некалькі момантаў.
Хто такія «ўдзельнікі пасялення родавых маёнткаў «Росы»?
Па факце Русы сустракаўся з групай адэптаў руху «Звінячыя кедры Расіі», які кантралюецца расійскім пісьменнікам-фантастам Уладзімірам Пузаковым (творчы псеўданім — Мегрэ).
Культ «кедраў» узнік пасля серыіі ягоных кніг аб жанчыне «ведрусцы» Анастасіі, якая па сюжэце жыве ў тайзе асобна ад усяго чалавецтва, вядзе натуральную гаспадарку і валодае звышмудрасцю.
У яе ёсць дзіцё ад Мегрэ, якога выхоўвае мядзведзь.
У тых кнігах наплецена рознага… Але Анастасія дае і цалкам практычныя парады: прадаваць кватэры, ехаць і ствараць паселішчы на тэрыторыі акурат 1 гектар, хадзіць басанож.
Некаторыя людзі вераць у праўдзівасць напісанага і таксама пачынаюць адносіць сябе да спадчыннікаў «ведрусаў», якія, маўляў, жылі на тэрыторыі Расіі ў даўніну і былі настолькі магутнымі, што «разбілі рымлян і Аляксандра Македонскага».
Чаму сведчанняў аб тых бітвах не захавалася ў гісторыі? Бо «яны былі такія разгромныя, што еўрапейскія летапісцы вырашылі не згадваць свой сорам».
«Звінячыя кедры Расіі» і «Анастасіеўцы» — гэта сінонімы.
Вядома таксама, што ў 2012 годзе ў Геленджыку загінулі дзве беларускі, якія былі адэптамі «Анастасіі» і прыехалі з мэтай зарадзіцца энергіяй. Тады следчыя органы Расіі канстатавалі, што меў месца няшчасны выпадак: «Каля Геленджыка вельмі шмат такіх сектантаў».
Спецыялісты называюць «Анастасіеўцаў» самай буйной сектанцкай супольнасцю на постсавецкай прасторы, але пры гэтым канстатуюць іх неваяўнічы характар.
Адметна, што ў Расіі іхнія спробы прасунуць закон аб «родавых маёнтках», як на тое ўказала «Анастасія», праваліліся. Не дапамаглі ў гэтым і публічныя заклікі Мегрэ да ўсіх сваіх адэптаў «падтрымліваць Адзіную Расію».
Цяпер жа «кедры», відаць, узяліся за прасоўванне сваіх ідэй у Беларусі.
Самымі буйнымі паселішчамі «кедраў» у Беларусі з'яўляюцца тыя самыя «Росы» ў Валожынскім раёне і «Звон-гара» пад Віцебскам.
На сайце сектантаў так і сказана, што «Росы» з'явіліся «ў 2003 годзе пасля выхаду ў свет серыі кніг пісьменніка Уладзіміра Мегрэ».
«Наша Ніва» паспрабавала звязацца з асобнымі адэптамі «Анастасіі» ў Беларусі, але яны ў грубай форме далі зразумець, што гаварыць пра сябе не хочуць. Асабліва востра яны адрэагавалі на пытанне, ці наведваюць іх дзеці школу.
