Трое маленькіх дзяцей пацярпелі праз кіроўцу, які чацвёрты раз трапіўся п'яным за стырном
Аварыя адбылася 31 жніўня ў Дзяржынскім раёне каля 23.15 на аўтадарозе Брэст — Мінск — мяжа Расійскай Федэрацыі, паведамляе афіцыйны прадстаўнік УДАІ УУС Мінскага аблвыканкама Сяргей Чабатароў.
38-гадовы мінчанін на «Фольксваген Джэта» ў стане алкагольнага ап'янення няправільна абраў дыстанцыю да транспарта, што рухаўся наперадзе, і ўехаў у аўтамабіль «Рэно Меган», якім кіраваў 30-гадовы жыхар Узды.
У выніку аварыі траўмы, у тым ліку цяжкія, атрымалі трое дзяцей: 3, 5 і 8 гадоў. Яны шпіталізаваныя ў Дзяржынскую бальніцу. Старэйшая дзяўчынка знаходзілася на пярэднім сядзенні, малодшыя хлопчык і дзяўчынка — у дзіцячых крэслах на заднім.
Віноўнік аварыі за парушэнні ПДР прыцягваўся да адказнасці ўжо 19 разоў. З іх тройчы за кіраванне ў нецвярозым стане. Цяпер ён можа пазбавіцца волі на 7 гадоў.
Кіроўца затрыманы, распачата крымінальная справа. Машыну, якая належыла сваячцы парушальніка, канфіскуюць, а ён заплаціць буйны штраф.
