Кіраўнік A-100 выстаўляе запраўкі на продаж
Фота Дар'і Буракінай
Уладальнік групы кампаній А-100 Аляксандр Цэнтэр выставіў на продаж сетку аднайменных заправак. Пра гэта TUT.BY распавялі тры крыніцы ў фінансавай сферы і нафтаперапрацоўцы.
«Даходы ўпалі, бізнэс сціснуўся, даўгі істотныя. Выхады два — альбо прадаць, альбо прыцягнуць інвестара», — сказаў адзін з суразмоўцаў.
«Так, А-100 выставіла на продаж і запраўкі, і нафтабазы. Колькі хочуць? Дорага. Пры такіх надбаўках бізнэс вельмі складаны. Хто можа купіць? Можа, расейцы купяць. Але гэта будзе больш палітыка», — адзначыла крыніца ў нафтаперапрацоўчым бізнэсе.
А-100 — гэта адзіная буйная ў Беларусі сетка АЗС з беларускім прыватным капіталам. Яна налічвае 34 заправачныя станцыі з наборам розных сэрвісаў, гаворыцца на сайце кампаніі. Большая частка заправак знаходзіцца ў Мінску і Мінскім раёне.
