Рэдактарка Tut.by Галіна Уласік вызвалілася са Следчага камітэта ВІДЭА
Пра гэта паведаміла Tut.by дачка журналісткі са спасылкай на адваката Андрэя Санковіча.
«Белсат» вядзе стрым ад будынка Следчага камітэта.
Уласік распавяла журналістам, што дала падпіску аб неразгалошванні. Падпіску аб нявыездзе з яе не бралі. Яна застаецца ў статусе падазраванай па «справе БелТА».
«Яны выграблі ўсё, што было ў доме», — распавяла пра ператрус у сваёй кватэры Галіна Уласік. Праваахоўнікі забралі сім-карты, флэшкі, тэлефоны і ноўтбукі. Большасць тэхнікі ёй пры вызваленні вярнулі.
«Заўтра, мабыць, выйду на працу. Таму што людзей у рэдакцыі, мяркуючы па ўсім, не засталося», — дадала яна.
Рэдактарка TUT.BY таксама падзякавала ўсім за падтрымку.
7 жніўня Галіна Уласік мела прыйсці ў офіс і заступіць на дзяжурства. Пазней стала вядома, што раніцай да яе прышлі з ператрусам працаўнікі Следчага камітэту. Пасля ператрусу рэдактарку затрымалі. Да сённяшняга дня яе ўтрымлівалі ў менскім ізалятары на Акрэсціна.
