У Расіі асудзілі да пажыццёвых тэрмінаў членаў жорсткай «банды ГТА», што забівалі людзей на трасе
Маскоўскі абласны суд прысудзіў да пажыццёвага зняволення чатырох членаў «банды ГТА», яшчэ адзін атрымаў 20 гадоў строгага рэжыму, піша rbc.ru.
Усе яны прызнаныя вінаватымі ў забойстве 17 чалавек на падмаскоўнай трасе.
Раней на лаве падсудных былі дзевяць чалавек, але чацвёра загінулі ў выніку перастрэлкі ў судзе ў жніўні мінулага года.
Працэс цягнуўся каля двух гадоў.
Члены банды, як прызнаў суд, у 2012—2014 гадах здзейснілі 14 нападаў на аўтамабілістаў на трасе М-4 «Дон» у Маскоўскай вобласці. Злачынцы спынялі аўтамабілі з дапамогай раскладзеных на дарозе шыпоў, расстрэльвалі пасажыраў і рабавалі іх. Усяго былі забітыя 17 чалавек, яшчэ сямёра пацярпелых ад нападаў выжылі.
Назва «банда ГТА» замацавалася за групоўкай па аналогіі з камп'ютарнай гульнёй Grand Theft Auto (GTA), герой якой рабуе і забівае кіроўцаў.
Злачынцаў затрымалі ў лістападзе 2014, пры гэтым меркаваны лідар банды быў забіты. Банду выявілі на загарадным участку супрацоўніка Генпракуратуры РФ. Той пазней даў следству паказанні, што здаваў аднаму з бандытаў у арэнду гаспадарчую пабудову, не ведаючы, чым той займаецца.
Абвінавачванне прыйшло да высновы, што бандыты мелі выключна карыслівы матыў — яны зганялі аўтамабілі забітых, выкрадалі грошы і каштоўнасці; агульны кошт скрадзенага склаў не менш за 17 млн руб.
Грошы былі патрэбныя членам банды, каб зладзіць узброены пераварот ва Узбекістане, — гэта, як пісала «Новая газета», вынікала з вывучаных судом матэрыялаў следства.
Па меншай меры аднаго з членаў банды ва Узбекістане пераследавалі за экстрэмізм, ён навучаўся ў Пакістане ў спецыялізаваным лагеры ў групе ісламскага джыхаду, як вынікала з яго паказанняў. Падчас трэніровак бандыты стралялі па мішэнях з фатаграфіяй прэзідэнта Іслама Карымава, пісала «Новая газета».
На думку баевікоў, прэзідэнт «давёў краіну да галечы».
Адвакаты абвінавачаных настойвалі, што іх падабаронныя здзяйснялі напады не па сваёй волі — лідар банды прымушаў іх да злачынстваў, пагражаючы забойствам.
1 жніўня мінулага года члены банды зладзілі перастрэлку з сілавікамі проста ў будынку суда, куды іх даставілі на чарговае пасяджэнне.
Насуперак інструкцыі пяцярых абвінавачаных суправаджалі ў суд ўсяго двое канваіраў, адна з якіх — жанчына; у залу пасяджэнняў іх везлі на ліфце.
Бандыты напалі на паліцэйскіх і завалодалі іх зброяй. Канваіры змаглі выклікаць падмацаванне. Калі ліфт прыбыў на трэці паверх суда, супрацоўнікі Расгвардыі адкрылі агонь па ўзброеных абвінавачаных. Трое загінулі на месцы. Яшчэ двое былі шпіталізаваныя, адзін з іх памёр у бальніцы.
