Юрыя Зісера дапыталі ў Следчым камітэце
Заснавальніка Tut.by Юрыя Зісера сёння выклікалі на допыт у Следчы камітэт па рэзананснай «справе БелТА». Планавалася, што допыт пачнецца ў 16.30.
У 19.26 Зісер на сваёй старонцы ў фэйсбуку паведаміў, што допыт завяршыўся. Ён пакінуў падпіску аб неразгалошванні.
Зісер праходзіць па справе ў якасці сведкі, ён знаходзіўся на допыце ў прысутнасці свайго адваката, паведамляе Tut.by.
Нагадаем, сёння стала вядома, што па «справе БелТА» затрымалі на 3 сутак журналіста Паўлюка Быкоўскага, які супрацоўнічае з «Нямецкай хваляй», а таксама рэдактара інтэрнэт-версіі газеты «Беларусы і рынак» Аляксея Жукава.
Паўлюка Быкоўскага і Аляксея Жукава затрымалі на 3 сутак
Таксама сёння стала вядома пра ператрус у рэдакцыі газеты «Культура».
Следчыя з ператрусам прыйшлі ў газету «Культура»
Сёння раніцай у офісе Realt.by па «справе БелТА» былі затрыманыя галоўны рэдактар сайта і тры журналісты: Ігар Хмара, Уладзіслаў Кулецкі, Марыя Сарока і Алена Маслоўская.
Па «справе БелТА» ўзялі на допыт чатырох супрацоўнікаў Realt.by
Акрамя Быкоўскага і Жукава, якіх затрымалі сёння на 72 гадзіны, затрыманымі ад учора застаюцца:
- Марына Золатава,
- Ганна Калтыгіна,
- Галіна Уласік,
- Ганна Ермачонак,
- Таццяна Каравянкова.
7 жніўня ператрусы і затрыманні адбыліся ў офісах Tut.by і БелаПАН. У СК заявілі, што падставай да крымінальнай справы стала паведамленне «БелТА» аб тым, што журналісты выданняў нібыта незаконна выкарыстоўвалі доступ да платнай версіі БелТА, не маючы на гэта купленай падпіскі.