Чачня аддае пашану чалавеку, які застрэліў палкоўніка Буданава: тысячы машын з'ехаліся ў яго родавае селішча
48-гадовы Юсуп Тэмерханаў, забойца палкоўніка Буданава, памёр 3 жніўня ў сібірскай калоніі. Афіцыйная версія — «ад хранічных захворванняў». І ад 3 жніўня ў селішча Гелдаган, дзе будзе пахаваны Тэмерханаў, едуць тысячы людзей.
Расійскі незалежны сайт «Кавказский узел» піша, что на ўездзе ў Гелдаган узніклі вялізныя заторы, людзі едуць з усіх раёнаў Чачні і Інгушэціі. А яшчэ тысячы людзей выказваюць спачуванні сваякам памерлага праз WhatsApp — самы папулярны мэсэнджар на Каўказе, адзначае расійскі незалежны сайт «Медуза».
Палкоўнік Буданаў стаў сімвалам пакут чачэнцаў у часе дзвюх войнаў за незалежнасць, другая з якіх была каўказцамі прайграная. Буданаў забіў, а некаторыя мяркуюць, што і згвалціў 18-гадовую Эльзу Кунгаеву з сяла Тангі.
Калі гісторыя набыла розгалас, суд над ім цягнуўся тры гады. Урэшце яго прызналі вінаватым.
Вызваліўся ён датэрмінова. Але ў 2011 годзе ў Маскве яго забілі чатырма кулямі на выхадзе з натарыяльнай канторы, дзе ён афармляў дазвол на выезд сваёй непаўналетняй дачцэ.
У забойстве Буданава вінаватым прызналі Тэмірханава. Сам ён віны так і не прызнаў. Пяць гадоў ён правёў у розных турмах. Для чачэнцаў, нават самых лаяльных Маскве, ён застаўся героем.
Кадыраўскі тэлеканал «Грозный» паведамляе: «Ужо другі дзень у двары Тэмерханавых бесперапынная плынь жыхароў Чачэнскай Рэспублікі і суседніх рэгіёнаў, якія прыйшлі выказаць спачуванні сваякам загінулага. Таксама словы спачування выказваюць шматлікія карыстальнікі сацыяльных сетак».
Самы вядомы расійскі баец змешаных адзінаборстваў Хабіб Нурмагамедаў выклаў фатаграфію Тэмерханова ў сваім інстаграме і напісаў: «Няхай Алах даруе твае грахі».
Чачэнка Зара Муртазаліева, якая жыве ў Парыжы, апублікавала відэа з цырымоніі развітання і напісала: «Кожны памрэ, але не кожны будзе жыць у памяці народа. Сваіх герояў народ выбірае сам».
Дзясяткі тысяч людзей віталі картэж з целам Тэмерханава воклічамі «Алах акбар» па дарозе з аэрапорта ў радзіннае селішча.
