Прэзідэнт Ірана прыгразіў ЗША. А Трамп адказаў у твітары капслокам
flickr.com
Прэзідэнт Ірана Хасан Раўхані ў нядзелю перасцярог ЗША ад вайны з Тэгеранам і запатрабаваў «не кусаць ільва за хвост». Прэзідэнт ЗША адказаў у твітары допісам з пагрозамі, напісаным толькі вялікімі літарамі.
Хасан Раўхані звярнуўся да ЗША падчас размовы з іранскімі дыпламатамі. «Амерыка павінна ведаць, што перамір'е з Іранам — гэта маці ўсіх перамір'яў, а вайна — маці ўсіх войнаў», — заявіў Раўхані. Ён адзначыў, што ЗША не павінны ўмешвацца ва ўнутраныя справы Ірана, і запатрабаваў «не кусаць ільва за хвост, бо гэта прывядзе толькі да шкадавання».
Дональд Трамп адказаў менш чым праз суткі. У ноч на 23 ліпеня ён апублікаваў у «Твітары» запіс, звернуты да Раўхані — і цалкам напісаны вялікімі літарамі.
To Iranian President Rouhani: NEVER, EVER THREATEN THE UNITED STATES AGAIN OR YOU WILL SUFFER CONSEQUENCES THE LIKES OF WHICH FEW THROUGHOUT HISTORY HAVE EVER SUFFERED BEFORE. WE ARE NO LONGER A COUNTRY THAT WILL STAND FOR YOUR DEMENTED WORDS OF VIOLENCE & DEATH. BE CAUTIOUS!
«НІКОЛІ НЕ ПАГРАЖАЙЦЕ ЗША, А ТО ПАЦЕРПІЦЕ ТАК, ЯК МАЛА ХТО Ў ГІСТОРЫІ ЦЯРПЕЎ. МЫ БОЛЬШ НЕ ТАЯ КРАІНА, ЯКАЯ БУДЗЕ ТРЫВАЦЬ ВАШЫЯ ДУРНЫЯ ПРАМОВЫ АБ ГВАЛЦЕ І СМЕРЦІ. АСЦЕРАГАЙЦЕСЯ», — напісаў прэзідэнт ЗША.
Раўхані пакуль не адказаў на заяву Трампа.
