Залева прывяла да транспартнага калапсу ў Магілёве ФОТЫ
У Магілёве з-за моцных залеваў адбыўся транспартны калапс, піша БелТА.
Моцная залева каля 20.00 22 ліпеня, можна сказаць, патапіла горад у вадзе: некаторыя вулачкі ператварыліся ў бурлівыя рэкі, а лагчыны і ўпадзіны — у азёры. Святлафоры на шэрагу скрыжаванняў выключыліся, праезд па іх быў абцяжараны высокім узроўнем вады, «плыць» па такім адважваліся далёка не ўсе аўтааматары. Узровень вады дасягаў у некаторых месцах 30—40 см.
Гарадскі грамадскі электратранспарт стаяў некалькі гадзін. Па горадзе перасоўваліся рэдкія маршруткі і аўтобусы. Нават дыспетчары таксі не прымалі заяўкі на выезд або абяцалі забраць пасажыра на працягу гадзіны. Дождж прыціх толькі за поўнач. І тралейбусы нарэшце змаглі вярнуцца ў аўтапаркі, а заадно забраць пасажыраў.
