Брытанскія студэнты сцерлі мурал з вершам нобелеўскага лаўрэата са сцяны ВНУ, бо лічаць аўтара расістам
Студэнты ўніверсітэта Манчэстара сцерлі са сцяны будынка навучальнай установы верш Рэдзьярда Кіплінга «Калі», абвінаваціўшы паэта ў расізме.
Фота: Facebook.
Твор нобелеўскага лаўрэата па літаратуры замянілі на верш «Я падымаюся» амерыканскай паэткі і грамадзянскай актывісткі Маі Энджэлоў.
Прадстаўніца студэнцкай рады Сара Хан выказалася ў фэйсбуку.
«Мы лічым, што Кіплінг з'яўляецца ўвасабленнем супрацьлеглага свабодзе, вызваленню і правам чалавека. Усяго таго, за што мы выступаем як студэнцкая рада», — лічыць актывістка.
Пры гэтым да самога верша «Калі» ў студэнтаў прэтэнзій няма.
Незадаволенасць выклікалі іншыя творы паэта.
Паводле Сары Хан, Кіплінг з'яўляецца «ўсеагульна вядомым аўтарам расісцкага верша «Цяжар белага чалавека» і многіх іншых твораў, якія апраўдваюць дзеянні Брытанскай імперыі ў Індыі і зневажаюць людзей розных этнічных груп».