Трое дзяцей адначасова выпалі з акна ва Уздзенскім раёне
Здарэнне адбылося 17 ліпеня ў адной з вёсак Уздзенскага раёна, піша sk.gov.by.
Cуседскія хлопчыкі знаходзіліся ў гасцях у дзяўчынкі (усім дзецям па пяць-шэсць гадоў) і гулялі без дарослых у дзіцячым пакоі на другім паверсе дома. Акно было прыадчынена, дзеці падставілі крэсла і залезлі на падаконнік.
Яны самастойна адчынілі створку акна, паклалі локці на маскітную сетку, якая затым сарвалася з мацаваннямі. У выніку дзеці ўпалі з вышыні больш за 5,5 метраў і атрымалі цялесныя пашкоджанні рознай ступені цяжкасці (траўмы галавы, пераломы сцягна, пляча, розныя ўдары).
СК чарговы раз звяртаецца да бацькоў з просьбай быць больш уважлівымі і асцярожнымі. «Не пакідайце дзяцей без нагляду, асабліва ў пакоі з адкрытым акном. Усе прадметы мэблі павінны быць адсунутыя ад вокнаў, каб дзіця не магло залезці на падваконнік. Стаўце на вокны спецыяльныя фіксатары, якія не дазволяць дзецям самастойна яго адкрыць», — адзначаюць у СК.
